Serj Tankyan - Wikipedia - Ureyim.az

Serj Tankyan 1967-ci il avqustun 21-də Livanda, regionda hökm sürən İsrail–Livan münaqişəsinin kəskinləşdiyi bir dövrdə anadan olmuşdur.^{[5] [6][7]} Bu zaman Fələstin Azadlıq Təşkilatı (FAT) Ərəb–İsrail münaqişəsi nəticəsində İsrail ərazisindən məcburi köçkün düşmüş fələstinlilərdən hərbi məqsədlərlə istifadə edərək İsrailə qarşı silahlı mübarizə aparırdı. 1975-ci ilədək regional vəziyyətin kəskin şəkildə gərginləşməsi Livanda vətəndaş müharibəsinin başlanmasına gətirib çıxarmışdır. Münaqişənin əsas səbəbləri FAT-ın hərbi əməliyyatları və ölkədaxili xristian-müsəlman qarşıdurması olmuşdur. Birləşmiş Millətlər Təşkilatının (BMT) zorakılığın azaldılması və münaqişədən zərər çəkmiş əhaliyə humanitar yardım göstərilməsi məqsədilə regiona müdaxiləsi zamanı səkkiz yaşlı Serj, 1915-ci il Erməni soyqırımından xilas olmuş nənə-babası da daxil olmaqla bütün ailəsi ilə birgə Amerika Birləşmiş Ştatlarında sığınacaq əldə etmişdir.^[8] 1975-ci ildə Tankyanlar ailəsi Los-Anceles şəhərinin Hollivud rayonuna köçürülmüşdür.

Los-Anceles şəhərinin Şərqi Hollivud rayonunda, "Kiçik Ermənistan" adlanan ərazidə yerləşən "Rose & Alex Pilibos" özəl təhsil müəssisəsində Serj Tankyan qardaşı Sevaq ilə birgə təhsil almağa başlamışdır. Sözügedən təhsil ocağı erməni əsilli Amerika vətəndaşlarının təhsili üçün təsis edilmiş kompakt məktəb idi.^[9] Təhsil illərində yüksək akademik göstəricilərə nail olan Serj Tankyan, həmyaşıdlarından fərqli olaraq, qeyri-ənənəvi dünyagörüşü ilə seçilmişdir. Yeniyetməlik dövründə ədəbiyyata, xüsusilə Tomas Eliotun poetik yaradıcılığına, erməni və Afrika xalqlarının musiqi irsinə, həmçinin 1980-ci illərin aparıcı musiqi kollektivlərinin yaradıcılığına xüsusi maraq göstərmişdir. Bundan əlavə, erməni diasporunun maraqlarının müdafiəsi istiqamətində fəaliyyət göstərən "Daşnaksutyun" təşkilatının sıralarına daxil olmuşdur. On yeddi yaşında "Iron Maiden" qrupunun konsert proqramını izləyən gənc Serj, məhz həmin tədbirdə ağır metal musiqisi janrı ilə tanış olmuşdur.

Serj orta təhsilini başa vurduqdan sonra ali təhsil almaq məqsədilə Nortridc Kaliforniya Dövlət Universitetinə (CSUN) qəbul olunur. Maddi gəlir əldə etmək baxımından ən perspektivli sahə hesab etdiyi üçün biznes və marketinq ixtisası üzrə bakalavr dərəcəsinə yiyələnir.^[10] Ali təhsil aldıqdan sonra müxtəlif korporasiyalarda istehsal, pərakəndə satış və mühasibatlıq sektorlarında fəaliyyət göstərir. Serjin qeyd etdiyinə görə, kiçik heyətlə birlikdə Kaliforniyada zərgərlik sənayesi üçün xüsusi mühasibat proqramı tərtib edir. Həmçinin zərgərlər üçün universal uçot sistemi və metal sənayesi üçün xüsusi proqram təminatı hazırlayırlar. Paralel olaraq, iyirmi yaşlarının əvvəllərindən ortalarınadək tədricən klaviatura çalmaq və vokal sənətinin sirlərini mənimsəyir.

Biznes fəaliyyətini həyata keçirdiyi dövrdə Serj Tankyan Amerika ermənisi olan həmfikirləri ilə birgə ilkin musiqi kollektivinin tərkibinə daxil olur. Kollektivdə klaviatura ifaçısı qismində fəaliyyət göstərən musiqiçinin yaradıcılığında formalaşdığı Şərq musiqisi, xüsusilə erməni xalq melodiyaları əhəmiyyətli rol oynayırdı. Həmin kollektiv "Forever Young" adı altında fəaliyyət göstərirdi. Onlar "Soil" adlı digər erməni musiqi qrupu ilə eyni məkanda məşqlər keçirirdilər. "Soil"in tərkibində vokalçı istisna olmaqla, gitara ifaçısı Daron Malakyan, bas-gitara ifaçısı Deyv Hakopyan və zərb aləti ifaçısı Dominqo fəaliyyət göstərirdi. Serj qrup üzvləri ilə əməkdaşlıq münasibətləri qurmuşdu. Hər iki kollektivin eyni məkanda məşq keçirməsi səbəbindən "Soil" üzvləri Serjin yüksək musiqi istedadının şahidi olurdular. Onlar nəinki onun klaviatura ifaçılığı qabiliyyətini, həmçinin özünəməxsus ifa tərzini və erməni xalq musiqisinin onun yaradıcılığına təsirini müşahidə edirdilər. Nəticədə "Soil" kollektivi Serji öz sıralarına dəvət edir.

Serj, "Forever Young" adlı ilk qrupundan ayrılaraq "Soil" kollektivinə solist qismində daxil olur. Musiqiçi, qrupun ağır metal təmayüllü ifasına özünəməxsus üslubunu və erməni musiqisinin elementlərini əlavə edir. 1995-ci ildə "Soil"in fəaliyyəti genişləndikcə, onların erməni əsilli dostu Şavo Odadciyan menecerlik funksiyasını öz üzərinə götürür və qısa müddətdə kollektivin ilk konsert proqramlarını təşkil edir. Qrupun debüt çıxışı Los-Ancelesin mərkəzində yerləşən "Café Club Fais Do-Do"da reallaşır. Konsert uğurla keçməsinə baxmayaraq, yaradıcılıq fikir ayrılıqları səbəbindən qrup üzvləri Deyv və Dominqo kollektivdən ayrılırlar. Nəticədə, qrupda əks qütbləri təmsil edən Serj və Daron qalır. Onlar minimal gitara bacarıqlarına malik olan Şavonu bas gitaraçı qismində qrupa dəvət edirlər. Kollektivin tərkibinin tamamlanması üçün zərb alətləri ifaçısı tələb olunurdu. Təbilçi Endi Xaçaturyanın qrupa qoşulması ilə kollektiv "System of a Down" adını qəbul edir. 1997-ci ildə Xaçaturyan əlindən aldığı xəsarətə görə qrupdan ayrılır və onun mövqeyini Con Dolmayan tutur.

Serj Tankyan 2012-ci il iyunun 9-da Kaliforniya ştatının Simi-Valli ərazisində məhdud dairədə keçirilən nikah mərasimində Ermənistanın Vanadzor şəhərindən olan partnyoru Anjela Madatyan ilə rəsmi nikaha daxil olmuşdur.^[11] 2014-cü il oktyabrın 24-də cütlüyün övladının dünyaya gəldiyi rəsmən təsdiqlənmişdir. 2015-ci ildən etibarən ailə Yeni Zelandiyanın Uorkvort şəhəri və Amerika Birləşmiş Ştatlarının Los-Anceles şəhəri arasında müvəqqəti məskunlaşma rejimində həyat sürdürür.^[12] Qeyd etmək lazımdır ki, Serj Tankyan "System of a Down" musiqi qrupunun üzvü Con Dolmayanın qayınıdır, belə ki, onların həyat yoldaşları bacıdırlar.^[13][14]

2018-ci ildə Serj Tankyan erməni qəhvə ənənələrinin təbliği və inkişafı məqsədilə "Kavat Coffee" adlı kommersiya müəssisəsinin təsisçisi olmuşdur.^[15]