 |
 |
Ureyim.az |  |
 |
Yung Lean (18 iyul 1996) — İsveç repçisi. O, klaud rep janrının ilk mərhələsində əhəmiyyətli rol oynayan şəxsiyyətlərdən biri sayılır. 2013-cü ildə "YouTube" platformasında viral olan "Ginseng Strip 2002" mahnısı ona böyük şöhrət qazandırıb.[2] Elə həmin il "Unknown Death 2002" adlı ilk miksteypini dinləyicilərin ixtiyarına verib. Növbəti ildə isə debüt studiya albomu "Unknown Memory" işıq üzü görüb.
| Yung Lean | |
|---|---|
.jpg) | |
| Ümumi məlumatlar | |
| Doğum adı | Jonatan Aron Leandoer Håstad |
| Ləqəbləri | Yung Lean, jonatan leandoer96, jonatan leandoer127 |
| Doğum tarixi | 18 iyul 1996 (28 yaş) |
| Musiqiçi məlumatları | |
| Fəaliyyəti | repçi, müğənni, mahnı yazarı[d], musiqi prodüseri |
| Fəaliyyət illəri | 2012-ci ildən |
| Janrlar | hip-hop[d], klaud rep[d] |
| Albom şirkətləri | YEAR0001[1] |
| yunglean.com | |
 Vikianbarda əlaqəli mediafayllar | |
2016-cı ildə ikinci miksteypini "Frost God" və ikinci studiya albomunu "Warlord" adı altında dinləyicilərin ixtiyarına verib. 2017-ci ildə üçüncü studiya albomunu – "Stranger" işıq üzü görəndən bir il sonra "Poison Ivy" adlı üçüncü miksteypi ilə pərəstişkarlarının görüşünə gəlib.[3] 2020-ci ildə sənətçi dördüncü studiya albomunu – "Starz"ı təqdim edib. Jonatan Leandoer96 təxəllüsü ilə hip-hop janrından kənara çıxaraq, indi-rok və neofolk qarışığından ibarət yeni üslubda "Nectar" (2019), "Blodhundar & Lullabies" (2020) və "Sugar World" (2023) albomlarını ərsəyə gətirib.
18 iyul 1996-cı ildə Stokholmda doğulan Yung Lean, İsveç ədəbiyyatının tanınmış simalarından olan, fransız ədəbiyyatından tərcümələr edən şair və fentezi yazıçısı Kristoffer Leandoer ilə keçmiş insan hüquqları fəalı Elsa Håstadın ailəsində böyüyüb.[4][5] Anası Elsa Håstad Rusiya, Vyetnam və Cənubi Amerikada LGBT qrupları ilə çalışmış, 2019-2023-cü illər arasında İsveçin Albaniyadakı səfiri vəzifəsini icra etmişdir.[6][7]
Lean uşaqlıq illərinin ilk dövrlərini Belarusun paytaxtı Minskdə keçirib. Anası onun öz uşaqlığına bənzər bir mühitdə böyüməsini arzuladığından ailəni Minskə köçürüb. Üç-beş yaşlarında ikən yenidən İsveçə qayıdan ailəsi Stokholmun Södermalm bölgəsində məskunlaşıb. Təhsil həyatının müəyyən dövründə – altıncı sinifdən onuncu sinfədək UNIS Hanoy məktəbində oxuyub.
Orta məktəb illərində narkotik maddələrdən istifadə və qraffiti çəkmək səbəbindən başı bəlalar çəkən Lean, bir müddət McDonald's restoranında işləyib. On beş yaşında kannabis çəkdiyinə görə şərti cəza alıb.[8] Hip-hop musiqisinə marağı get-gedə artan Lean-in ilk ilham qaynaqları 50 Cent-in "Get Rich or Die Tryin", "The Latin Kings" qrupunun "Mitt Kvarter" və Nas-ın "Illmatic" albomları olub.[9][10][11]
.jpg)
2012-ci ildə Stokholmun məhəlli parkında Yung Lean, Yung Sherman və Gud ilə tanış olmuş, eyni musiqi zövqlərini bölüşdüklərini kəşf edərək dostlaşmışdılar. Bu dostluq nəticəsində "Hasch Boys" kollektivini yaradırlar.[12] Sonradan "Drain Gang" qrupunu formalaşdıracaq digər Stokholm sənətçilər də bu kollektivə qoşulur.
"Hasch Boys" üzvlərinin əksəriyyəti qrupa marağını itirdikdə, Lean, Sherman və Gud ayrılaraq üçlük halında "Sad Boys" qrupunu təsis edirlər.[13] 2012-ci ildə Yung Gud və Yung Sherman musiqi bəstələyib mikslər hazırlayarkən, Lean zirzəmisindəki sadə studiyada mahnı sözləri yazıb vokal ifa etməyə başlayır. Yaratdıqları musiqini SoundCloud və Tumblr platformalarında paylaşmış, Lean qısa müddətdə böyük dinləyici kütləsi toplamışdır.[14][15][16][17][18] "Sad Boys" ilk konsertini 2013-cü il mayın 5-də İsveçin Göteborg şəhərində verir.
Yung Lean "Ginseng Strip 2002" mahnısına çəkilən videoklipin viral olması ilə məşhurlaşır.[19][20][21][22] 2013-cü ildə ilk rəsmi işlərini – Kreayshawn ilə birgə "Marble Phone" sinqlınl, "Unknown Death 2002" albomunu və "Ginseng Strip 2002" mahnısı daxil olmaqla "Lavender" minialbomunu təqdim edib. "Consequence of Sound" "Ginseng Strip 2002"ni "2013-cü ilin ən yaxşı 50 mahnısı" siyahısında 44-cü yerə layiq görmüş, "Vibe" jurnalı isə "Unknown Death 2002"ni "2013-cü ilin ən az diqqət çəkən 10 debüt rep miksteypi" siyahısına daxil edərək, onu Lil B-nin sərbəst assosiativ, çox vaxt mənasız qafiyələrinin daha melodik versiyası kimi dəyərləndirib.[23][24]
2013-cü ildə Yung Lean və "Sad Boys" Avropa turnesinə çıxırlar. Həmin il "Acclaim" jurnalı Yung Lean ilə "kiçik söhbət" formatında müsahibə aparmış, ona müxtəlif mövzularda – sevimli xumarlıq müalicəsindən tutmuş kompüter ekranının fon şəklinədək suallar ünvanlamışdır.[25]
2014-cü ildə Yung Lean və "Sad Boys" qrupu Avropanın 24 şəhərini əhatə edən "White Marble" turnesinə çıxıb. Bu turnenin başa çatmasından dərhal sonra "Sad Boys" Şimali Amerikanın müxtəlif şəhərlərində konsertləri əhatə edəcək "Black Marble" turnesini elan edib. İlk konsert Nyu-Yorkdakı Webster Hall-da təşkil olunmuş, "XXL" və "The New York Times" kimi nüfuzlu nəşrlərin tənqidçiləri tərəfindən yüksək qiymətləndirilib.[26][27][28][29][30][31][32][33][34]
2014-cü ilin may ayında "Studio PSL" verilişində çıxış edən sənətçi, həmin il "P3 Gold" mükafatlarının "Hip-Hop/Soul" kateqoriyasında beş əsas namizəddən biri olur.[35][36]
Sentyabrın 23-də Yung Lean ilk tam formatli albomunu – "Unknown Memory"ni işıq üzünə çıxarıb.[37][38] Albomun təqdimatı çərçivəsində dekabrın 1-də Webster Hall-ın əsas səhnəsində anşlaqla keçən konsertlə başlayan Şimali Amerika və Avropa turnesi təşkil olunub.[39]
2016-cı il fevralın 25-də ikinci albomunu – "Warlord"u təqdim edən ifaçı, eyni zamanda "Sad Boys Entertainment" geyim markasını yaradıb.[40] İyul ayında Calvin Klein-in payız-qış kolleksiyasının üzü olan sənətçinin Amerikadakı "Warlord" turnesində onun turne avtobusu Pensilvaniyada atəşə tutulub.[41] Tənqidçilərin yüksək qiymətləndirdiyi Frenk Ouşenin "Blonde" albomunda "Godspeed" və "Self Control" mahnılarında bekvokalist kimi iştirak edib. Lean-in sözlərinə görə, albom üçün vokal partiyaları on yeddi yaşında ikən Londonun mərkəzində yerləşən Ouşenin mənzilində yazılıb.[42]
2016-cı il noyabrın 25-də Yung Lean gözlənilmədən "Hennessy & Sailor Moon" adlı yeni mahnısını Bladee ilə birgə təqdim edib.[43] Dekabr ayının 14-də isə həmin mahnı ilə yanaşı A$AP Ferg-in iştirak etdiyi "Crystal City" kompozisiyasının da yer aldığı səkkiz mahnılıq "Frost God" miksteypini yayımlayıb.
2017-ci ilin noyabrında Lean-in yaradıcılıq yolunda əhəmiyyətli dönüş baş verib. Sənətçi "YEAR0001" şirkəti ilə əməkdaşlıq çərçivəsində özünün üçüncü albomunu dinləyicilərin ixtiyarına verib. "Stranger" adlanan bu alboma "Red Bottom Sky", "Hunting My Own Skin" və "Skimask" kimi mahnılar daxil edilib.
2018-ci ilin əvvəllərində "Complex" jurnalına müsahibəsində musiqiçi bir neçə ssenari üzərində işlədiyini açıqlayıb. Bunlardan biri İsveçin məşhur cinayətkarı Con Ausoniusun – "Lazer adam" ləqəbli qatilin həyatından bəhs edirdi.[44] Elə həmin ilin fevralında Yung Lean yaradıcılığında yeni səhifə açılmış, Thaiboy Digital ilə birgə "King Cobra" mahnısını təqdim etmişdir. Bununla yanaşı, Converse brendinin "One Star Toxic" kolleksiyasının hazırlanmasında iştirak etmişdir.[45]
2018-ci ilin oktyabrında Yung Lean Drain Gang qrupunun üzvü Whitearmor ilə birgə "Poison Ivy" miksteypini yaradıb.[46] Oktyabrın 24-də işıq üzü görən "Happy Feet" sinqlından sonra noyabrın 2-də təqdim olunan albom İsveçin Sverigetopplistan çartında 44-cü pilləyə yüksəlib.[47]
2019-cu ilin yanvarında musiqiçi Jonatan Leandoer96 təxəllüsü ilə ilk tam formatli albomunu – "Nectar"ı dinləyicilərin ixtiyarına verib. "Wooden Girl", "Nectar" və "Tangerine Warrior" mahnılarının yer aldığı bu albomda sənətçi əvvəlki hip-hop üslubundan uzaqlaşaraq, indi-rok və neofolk janrlarının sintezini yaradıb.
2020-ci ilin 26 fevralında Yung Lean daimi əməkdaşı Whitearmor tərəfindən prodüserliyi edilmiş "Boylife in EU" sinqlını dinləyicilərin ixtiyarına verib. Mart ayının 27-də isə sənətçi dördüncü studiya albomu "Starz"dan qarışıq parçaların yer aldığı 44 saniyəlik öntanıtım videosunu ictimaiyyətə təqdim edib. Qlobal COVID-19 pandemiyası səbəbindən martın sonlarında başlaması planlaşdırılan "Starz" konsert turu təxirə salınmış, bunun əvəzində 2 aprel tarixində Yung Lean məxfi məkanda yük maşınının üstündən 45 dəqiqəlik canlı yayım konserti təşkil etmişdir. Bu konsertdə əvvəlki əsərlərindən seçmələrlə yanaşı, təzə buraxılmış "Boylife in EU" mahnısı da səsləndirilib. Aprelin 14-də "Starz" albomunun "Violence + Pikachu" adlı ikinci tək mahnısı yayımlayıb. Whitearmor və Yung Sherman tərəfindən prodüserliyi edilən, başlıq mahnısında Ariel Pink-in iştirak etdiyi "Starz" albomu 15 may 2020-ci ildə işıq üzü görüb.
2020-ci il noyabrın 9-da Yung Lean Jonatan Leandoer96 layihəsi altında ikinci tam formatli albomu olan "Blodhundar & Lullabies"i elan edib. 16 mahnıdan ibarət bu albom bir ay sonra, dekabrın 21-də dinləyicilərin ixtiyarına verilib.
2020-ci il noyabrın 27-də kinoteatrlarda "Yung Lean: In My Head" adlı sənədli film nümayiş olunmağa başlayıb.[48] Musiqi sənədli filmlərinin rejissoru Henrik Burmanın çəkdiyi film Lean-in erkən yaradıcılıq dövrünü "'Stranger" albomunun buraxılışına qədər işıqlandırır. Filmdə Lean-in özü, musiqiçi dostu Bladee, meneceri Oskar Ekman, keçmiş əməkdaşı Stiven Maçat, "The Fader" və "Pitchfork" kimi nüfuzlu nəşrlərin jurnalistləri Mayamidə baş vermiş hadisələrə dair düşüncələrini bölüşürlər. Sənədli filmin əvvəlcə 2020-ci il Tribeka Film Festivalında nümayişi planlaşdırılırdı, ancaq COVID-19 pandemiyası səbəbindən təxirə salınıb.[49] Film həmin ilin payızında rəqəmsal formatda buraxılmış, məhdud sayda kinoteatrlarda nümayiş olunmuşdur.
2022-ci il aprelin 8-də Yung Lean FKA twigs, Skrillex, Drain Gang və Ant Wan kimi sənətçilərin iştirakı ilə on iki mahnıdan ibarət "Stardust" adlı miksteypini təqdim edib.[50]
Dekabrın 14-də Jonatan Leandoer96 imzası ilə "Blue Light" tək sinqlı üzü görüb, Olle Knutson və Philip Hovensjö-nun rejissorluğunda çəkilmiş videoklip də musiqisevərlərin ixtiyarına verilib. Bu təqdimat sənətçinin "Sugar World" adlı tam formatda albomunun anonsu olub. Albom məhz 3 fevral 2023-cü ildə dinləyicilərin öhdəsinə buraxılıb.[51]
Trevis Skottun "Utopia" albomunda məkan alan "Parasail" kompozisiyasında Yung Lean qonaq ifaçı qismində çıxış edib.[52] Daha ətraflı qeyd etmək gərəkdir ki, musiqi əsəri 28 iyul 2023-cü ildə yayımlanıb. Bladee ilə birgə ərsəyə gətirdiyi "Psykos" albomunu 13 mart 2024-cü ildə təqdim edib.[53] İsveçli müğənni Robyn-lə bərabər Charli XCX-in "360" sinqlının remiks versiyasında iştirak edib, bu isə 31 may 2024-cü ildə dinləyicilərin qəlbinə yol tapıb.[54][55]
4 noyabr 2024-cü ildə Yung Lean-in Charli XCX ilə bərabər "Sacrifice" filmində rol alacağı məlum olub, bu onun ilk böyük ekran debütüdür.[56][57] Həmin ayın sonlarında ifaçı "YEAR0001" şirkəti ilə əməkdaşlığına son qoyduğunu, bundan sonra musiqi əsərlərini "World Affairs" adlı şəxsi şirkəti vasitəsilə yayımlayacağını bəyan edib.[58]
Yung Lean 21 yanvar 2025-ci ildə özünün beşinci studiya albomunun – "Jonatan"ın yaxın vaxtlarda işıq üzü görəcəyini elan edib.[59][60]
1 mart 2025-ci ildə Stokholmdakı Avicii Arenanın səhnəsində 10 mindən artıq dinləyici qarşısında unudulmaz konsert proqramı ilə çıxış edib. İsveç mətbuatının böyük marağına səbəb olan gecədə "Aftonbladet" qəzeti konserti "kollektiv zəfər" adlandırıb.[61][62] Açılış çıxışını sənətçinin çoxillik dostu Yung Sherman edib, gecə ərzində səhnəyə Yung Gud, Ecco2K, Bladee, Thaiboy Digital kimi tanınmış musiqiçilər də qonaq qismində qoşulublar.
"XXL" jurnalı 2014-cü ildə tərtib etdiyi "Tanımalı olduğunuz 15 avropalı rep ifaçısı" siyahısına onu daxil edib. "Fact" jurnalı "Unknown Death 2002" miksteypini Clams Casino və Beautiful Lou-nun yenilikçi üsullarının məntiqi davamı kimi dəyərləndirərək, əsərin nadir və səmimi cazibəsi ilə seçilən, qəmli notlarla zəngin musiqi nümunəsi olduğunu vurğulayıb.[63] "Fact" jurnalı 2013-cü ildə dərc etdiyi "Sad Boys-un yüksəlişi: Kompakt-dan Yung Lean-ə qədər elektron musiqiçilərin kədərlərini ifadə etmə tarixi" adlı məqalədə Yung Lean-in "Unknown Death 2002" miksteypini qəmgin rep janrının zirvəsi adlandırıb.[64]
"Entertainment Weekly" nəşri Yung Lean-i klaud rep hərəkatı ilə qismən əlaqəli ifaçı kimi xarakterizə edib.[65] "HighClouds" musiqi portalının təhlilinə əsasən, Yung Lean-in uğurunun əsas səbəblərindən biri Yung Gud və Yung Sherman-ın Clams Casino-nun klaud rep tərzini elektron musiqi elementləri ilə məharətlə birləşdirən bəstələridir.[66]
Yung Lean məsləkdaşı, Sad Boys-un üzvü Gud ilə birgə post-pank janrında çıxış edən Död Mark qrupunun vokalçısı olaraq fəaliyyət göstərir.[67] İkilik 2016-cı ildə Stokholm şəhərinin "YEAR0001" leyblı vasitəsilə "Drabbad av Sjukdom" adlı ilk albomunu dinləyicilərin ixtiyarına verib.
Musiqidən kənar fəaliyyətində, qəribə bir cinayətkar dramı və İsveç mənşəli qatil Con Ausoniusun həyatından bəhs edən rok-opera üzərində işləyən Hostad, aktyorluq sahəsində də özünü sınamaq niyyətindədir.[68][69]
Mütaliə, keramika sənəti, rəssamlıq, yazı və piano çalmaq kimi müxtəlif məşğuliyyətlərə maraq göstərən sənətçi, psixoloji müalicə mərkəzindən çıxdıqdan sonra rəsm çəkməyə başlamışdır.[70][71] Hostad 2019-cu ildə Kaleidoscope jurnalına verdiyi müsahibədə 2017-ci ildə bipolyar pozuntusu diaqnozu aldığını açıqlamış, hazırda bu xəstəliyə qarşı dərman qəbul etdiyini bildirmişdir.[72]
"Warlord" adlı ikinci studiya albumu üzərində işlədiyi müddətdə Lean ABŞ-nin Mayami-Biç şəhərində məskunlaşmışdır. Bu dövrdə o, Ksanaks, Lin və kokain asılılığına düçar olub. 2015-ci il aprelin 7-də Lean-im vəziyyəti ağırlaşmış, dərhal Maunt Sinay Tibb Mərkəzi və Mayami Ürək İnstitutuna yerləşdirilmişdir. Hostadın səhhətinin pisləşməsi və xəstəxanaya yerləşdirilməsi onun meneceri və yaxın dostu Baron Maçatın vəfatı ilə eyni vaxta təsadüf edib. Bu hadisədən sonra Lean ailəsinin yanına, İsveçə qayıdıb.[73] Həmin vaxt atası xəstəxanada olan oğlunu ziyarət etmək üçün yola düşmüş, dörd gün ərzində onun yanında qalmışdır. Lean-in sözlərinə görə, əvvəlcə atasını tanımaqda çətinlik çəkmiş, daha sonra birlikdə İsveçə dönmüşlər. Təxminən iki ay ərzində Lean kənd ərazisində, nisbi təcrid şəraitində atasının nəzarəti altında sağlamlığını bərpa etmiş, bundan sonra Stokholmda yerləşən valideynlərinin evinə köçmüşdür.[74]
Öz yaradıcılığında yeni sərhədlər aşaraq emo rep, klaud rep və SoundCloud rep kimi alt janrların formalaşmasında mühüm rol oynayan Hostad, müasir musiqi səhnəsində özünəməxsus yer tutmağı bacarıb. Onun novator yanaşması gənc nəsil musiqiçilərə dərin təsir göstərib.[75][76][77][78][79] 2019-cu ildə Dublin şəhərindəki Triniti Kollecinin Universitet Fəlsəfə Cəmiyyəti tərəfindən mədəniyyət sahəsindəki nailiyyətlərinə görə Bram Stoker medalına layiq görülüb.[80]
Studiya albomları
Miksteyplər
 |
 |
UREYIM.AZ |  |
 |
|