Azerbaycan Edliyye Akademiyasi - Wikipedia - Ureyim.az

Müstəqil Azərbaycan Respublikasının mühüm dövlətçilik təsisatlarından biri olan ədliyyə orqanlarının formalaşması və inkişafında mühüm rol oynayan, yeni nəsil peşəkar və ixtisaslı kadrların hazırlanmasını həyata keçirən Ədliyyə Akademiyası Azərbaycan Respublikası Ədliyyə Nazirliyinin tabe qurumudur.

“Ədliyyə orqanlarının inkişafı haqqında” Azərbaycan Respublikası Prezidentinin 17 avqust 2006-cı il tarixli 446 nömrəli Fərmanı^[2] ilə Ədliyyə Nazirliyinin strukturu daxilində Ədliyyə Nazirinyinin Baş idarə səlahiyyətləri ilə Ədliyyə Akademiyası yaradılmışdır.

Azərbaycan Respublikası Prezidentinin 21 noyabr 2008-ci il tarixli 24 nömrəli Fərmanı^[3] ilə "Azərbaycan Respublikası Ədliyyə Nazirliyinin Ədliyyə Akademiyasının Nizamnaməsi" təsdiq edilmişdir.

Ədliyyə Naziriyi Kollegiyasının 29.09.2011-ci il tarixli 2-N nömrəli Qərarı^[4] ilə "Azərbaycan Respublikası Ədliyyə Nazirliyinin Ədliyyə Akademiyasına qulluğa qəbul olunmaq üçün namizədlərlə müsabiqənin və müsahibənin keçirilməsi Qaydaları" təsdiq edilmişdir.

Azərbaycan Respublikası Prezidentinin 19 may 2022-ci il tarixli 3263 nömrəli Sərəncamı^[5] ilə Şahin Məhərrəm oğlu Əliyev Azərbaycan Respublikası Ədliyyə Nazirliyinin Ədliyyə Akademiyasının rektoru təyin edilmişdir.

Nizamnaməsinin 12-ci bəndinə uyğun olaraq, Akademiyanın fəaliyyətinin əsas məqsədi ədliyyə, prokurorluq və məhkəmə orqanları, vəkillik fəaliyyəti üçün ixtisaslı kadrların hazırlanması, ali hüquq təhsili olmayan ədliyyə işçilərinin hüquqi hazırlığının təmin edilməsi, ədliyyə və məhkəmə orqanlarının, vəkilliyin inkişafı naminə konseptual problemlərin tədqiq edilməsi, hüquq elminin müxtəlif sahələri üzrə fundamental, eksperimental və tətbiqi elmi araşdırmaların aparılmasıdır.

Nizamnaməsinə uyğun olaraq Ədliyyə Akademiyasının əsas vəzifələri aşağıdakılardır:

1. ilk dəfə ədliyyə orqanlarına qulluğa qəbul edilən namizədlərin, habelə vəkilliyə namizədlərin peşə fəaliyyətinə buraxılması məqsədilə icbari təlimin keçirilməsi;
2. ali hüquq təhsili əsasında müxtəlif kateqoriyadan olan işçilərin peşə hazırlığının həyata  keçirilməsi və əlavə təhsilinin təmin edilməsi;
3. hakim vəzifəsinə namizədlərin ilkin uzunmüddətli tədrisinin, habelə hakimlərin davamlı tədrisinin keçirilməsi;
4. hüquq elmləri sahəsində dissertantların və doktorantların hazırlanması;
5. ali ixtisas təhsili əsasında müxtəlif kateqoriyadan olan işçilərin hüquqi biliklərə yiyələnməsi məqsədilə hazırlanması və əlavə təhsilinin həyata keçirilməsi;
6. ali təhsil müəssisələrinin elmi-pedaqoji heyətinin əlavə təhsilinin həyata keçirilməsi;
7. dövlətin və cəmiyyətin yüksək ixtisaslı hüquq mütəxəssislərinə olan ehtiyacının ödənilməsi;
8. fundamental, eksperimental və tətbiqi elmi araşdırmaların aparılması, məhkəmə, hüquq mühafizə orqanları və digər dövlət və qeyri-dövlət qurumları üçün məlumat-analitik, elmi-metodik materialların, tövsiyələrin hazırlanması;
9. Akademiyanın maddi-texniki və metodiki bazasının, tədris və elmi fəaliyyətinin daim inkişaf etdirilməsi;
10. cəmiyyətin mədəni, mənəvi və elmi dəyərlərinin qorunması və artırılması;
11. hüquqi maarifləndirmə işinin aparılması.

Akademiya aşağıdakı kateqoriyadan olan dinləyicilərin hazırlanmasını və ixtisasının artırılmasını həyata keçirir:

1. ədliyyə işçilərinin və ilk dəfə ədliyyə orqanlarına qulluğa qəbul olunan namizədlərin;
2. hakimlərin, hakim vəzifəsinə namizədlərin;
3. prokurorluq orqanları işçilərinin;
4. məhkəmə aparatı işçilərinin;
5. vəkillərin və vəkilliyə namizədlərin;
6. xüsusi notariusların;
7. dövlət orqanları işçilərinin, bələdiyyə üzvlərinin və qulluqçularının;
8. mülkiyyət növündən asılı olmayaraq idarə, müəssisə və təşkilatların işçilərinin;
9. Akademiyanın fəaliyyətinin əsas məqsədlərinə və vəzifələrinə müvafiq digər kateqoriyalardan olan şəxslərin.

Nizamnaməsinin 16-ci bəndinə əsasən Akademiya öz vəzifələrini həyata keçirmək üçün qanunvericiliklə müəyyən edilmiş qaydada aşağıdakı hüquqlara malikdir:

1. Azərbaycan Respublikasının qanunvericiliyinə və bu Nizamnaməyə uyğun olaraq tədris prosesini sərbəst həyata keçirmək;
2. tədris, metodiki, elmi-tədqiqat, analitik informasiya və başqa fəaliyyətini planlaşdırmaq və təşkilini həyata keçirmək;
3. təhsil və ixtisas proqramlarını, tədris planlarını işləyib hazırlamaq və müəyyən edilmiş qaydada təsdiq etmək;
4. tədris prosesinin metodiki təminatını təşkil etmək və təkmilləşdirmək;
5. fəaliyyətinin ayrı-ayrı istiqamətlərinin, o cümlədən tədris və elmi-tədqiqat fəaliyyətinin tənzimlənməsi məqsədilə Azərbaycan Respublikasının qanunvericiliyinə uyğun olan aktlar qəbul etmək;
6. tədrisin keyfiyyətinə cari nəzarəti və dəyişən heyətinin attestasiyasını həyata keçirmək;
7. elmi tədqiqatlar aparmaq, tədris və elmi-tədqiqat proseslərinin təşkili, ədliyyə orqanlarının, vəkilliyin fəaliyyəti ilə bağlı redaksiya-nəşriyyat işlərini həyata keçirmək;
8. kadr işini həyata keçirmək;
9. əməyi saathesabı ödənilməklə tədris məşğələlərinin aparılması üçün işçiləri, o cümlədən müstəqil ekspertləri və mütəxəssisləri qanunvericiliklə müəyyən olunmuş qaydada öz fəaliyyətinə cəlb etmək;
10. Akademiyanın daxili intizam qaydalarını qəbul etmək;
11. Akademiyanın işçilərini müəyyən edilmiş qaydada fəxri adlar verilməsinə, dövlət təltifinə və mükafatlarına təqdim etmək;
12. fəaliyyət istiqamətləri üzrə beynəlxalq əlaqələr qurmaq;
13. elmi iclaslar, seminarlar, konfranslar və digər bu kimi tədbirlər keçirmək və onların işində iştirak etmək;
14. vəzifələrinin icrası ilə əlaqədar digər hüquqları həyata keçirmək.

1. ↑ "Azərbaycan Respublikasının Ədliyyə Nazirliyi, Ədliyyə Akademiyası". justice.gov.az. İstifadə tarixi: 2025-06-02.
2. ↑ Hüquqi Aktların Dövlət Reyestri. "Ədliyyə orqanlarının inkişafı haqqında Fərman". e-qanun.az (az.). İstifadə tarixi: 2025-06-02.
3. ↑ Hüquqi Aktların Dövlət Reyestri. "Azərbaycan Respublikası Ədliyyə Nazirliyinin Ədliyyə Akademiyasının Nizamnaməsinin təsdiq edilməsi haqqında Fərman". e-qanun.az (az.). İstifadə tarixi: 2025-06-02.
4. ↑ Hüquqi Aktların Dövlət Reyestri. "Ədliyyə Akademiyasına və Məhkəmə Ekspertizası Mərkəzinə qulluğa qəbulun tənzimlənməsi barədə Ədliyyə Naziriyinin Kollegiya Qərarı". e-qanun.az (az.). İstifadə tarixi: 2025-06-02.
5. ↑ Hüquqi Aktlaırn Dövlət Reyestri. "Ş.M.Əliyevin Azərbaycan Respublikası Ədliyyə Nazirliyinin Ədliyyə Akademiyasının rektoru təyin edilməsi haqqında Prezident Sərəncamı". e-qanun.az (az.). İstifadə tarixi: 2025-06-02.