Annallar Mektebi - Wikipedia - Ureyim.az

Annallar məktəbi (fr. École des Annales), həmçinin "Yeni tarix elmi" (fr. La Nouvelle Histoire) — Lüsyen Fevr və Mark Blok tərəfindən qurulan tarixi istiqamət. "Annallar" jurnalı ətrafında formalaşan bu tarixi məktəb XX əsrin bütün dünya tarixşünaslığının inkişafına mühüm təsir göstərmişdir.

1929-cu ildə Lüsyen Fevr və Mark Blok bu gün də nəşr olunan "İqtisadi və sosial tarixi annallar" (Fr. Annales d'histoire économique et sociale) jurnalını yaratdılar. Bu jurnalda tarixçilər "bütövlükdə" tarixi xarakterizə edən məqalələr, tarixin təkcə siyasi, hərbi və diplomatik aspektləri ilə məhdudlaşmayan məqalələr dərc etməyə çalışırdılar. Beləcə yeni istiqamət yarandı və Annallar jurnalı ətrafında qruplaşdı. Onların təqdimatında klassik "tarix-hekayə" janrı "tarix-problem" ilə, eyni zamanda "ümumi" tarix, yəni cəmiyyətdə mövcud olan bütün əlaqələri ilə – iqtisadi, sosial, mədəni əvəz olundu. Alimlər tədqiqatlarının mərkəzinə görkəmli şəxsiyyətlərin fəaliyyəti, hadisələrin təsvirini deyil, bütövlükdə cəmiyyəti qoymağa, uzun zamanlar ərzində mövcud olan dərin strukturları üzə çıxarmağa çalışmağa başladılar. Bu yanaşma bir-biri ilə əlaqəli elmlərin — sosiologiya, etnoqrafiya, coğrafiya və başqalarından məlumatların cəlb edilməsini, həmçinin tarixi mənbələrin dairəsinin genişləndirilməsini tələb edirdi. "Yeni tarix elminin" tərəfdarları arxeologiya, texnologiya tarixi, dilçilik, din, müqəddəslərin həyatı və s. üzrə tədqiqatların nəticələrinə əsaslanırdılar. Bu, tarix elmində qnoseoloji dönüşə səbəb oldu: mənbə özü laldır, tədqiqatçı ona suallar verir, hətta saxtalaşdırılmış mənbə belə dəyər qazanır, çünki saxta mənbənin nə üçün yarandığı, ondan kimlərin faydalandığını deyə bilir. Bu cərəyanın tərəfdarları konkret dövrə aid insanların kütləvi təmsillərini, əsrlər boyu dəyər münasibətlərinin dəyişməsini, tarixi idrak problemini və s. öyrənirlər.