Buceci Sfinksi - Wikipedia - Ureyim.az

Qaya milyonlarla il davam edən külək eroziyası nəticəsində yaranmışdır və quruluşu səbəbilə qadın üzü ilə müqayisə olunur.^[1] Qaya 12 metr enində və 8 metr hündürlüyündədir. Qayanın yuxarı hissəsi qumdaşı mikrokonqlomeratlarından, aşağı hissəsi əhəngdaşı və kristal süxurlar ehtiva edən konqlomeratlardan ibarətdir. Qayanın şimal tərəfindən görünən Sfinks profili aşınmış süxurların nəticəsində formalaşmışdır.^[2]

Qaya Misirdə yerləşən Böyük Sfinks heykəli ilə müqayisə olunduğu üçün belə adlanmışdır. Qayanın ilk fotosu 1900-cü ildə çəkilmişdir.^[2] Buçeci Sfinksi Rumıniyanın turistik yerlərindən biridir və "Rumıniyanın Yeddi təbiət möcüzəsi"ndən biri hesab olunur. Buçeci Təbiət Parkının əsas görməli yerlərindən biridir.^[3] Hər ilin 28 noyabr tarixində yerli sakinlər və turistlər günəş batarkən qaya ətrafında yaranan fenomeni izləmək üçün qayanın ətrafında toplaşırlar.^[4]

Sfinks bir sıra konspirasiya nəzəriyyələri ilə əlaqələndirilir. Bəziləri qayanın ətrafında güclü elektromaqnit sahəsinin olduğunu iddia edir. Bəziləri qayanın qədim bir sivilizasiya tərəfindən bir tanrını təmsil etmək üçün oyulduğunu düşünür. Qayanın yerləşdiyi yerdə tərk edilmiş uran mədəninin və ya bəşəriyyətin bütün biliklərini ehtiva edən kristalların olduğunu bildirən konspirasiya nəzəriyyəsi də mövcuddur.^[1] Bir başqa konspirasiya nəzəriyyəsi Misirdəki Böyük Sfinks ilə Buçeci Sfinksi arasında gizli tunelin olması barəsindədir.^[4]

Sfinks Rumıniya istehsalı "Daki" (1967), "Sütun" (1968) və "Burebista" (1980) filmlərində yer almışdır. Qaya "Burebista" filminin posterində yer alır. Film Sfinksin göründüyü səhnə ilə başlayır və göründüyü səhnə ilə başa çatır.^[5]

•   Vikianbarda Buçeci Sfinksi ilə əlaqəli mediafayllar var.