 |
 |
Ureyim.az |  |
 |
Kubrik baxışı – filmlərlə dəli və çılğın personajları təsvir etmək üçün istifadə olunan texnika.[1]
.png)
Texnikanın adı bundan tez-tez istifadə etmiş rejissor Stenli Kubriklə bağlı olsa da, ondan öncə başqa rejissorlar da bu texnikadan istifadə etmişdirlər.[2] Termin kinematoqraf Duqlas Milsam tərəfindən ortaya atılmışdır. O, "Mexaniki portağal" (1971) filmində Aleksin üz ifadəsini təsvir etmək üçün "Kubrik baxışı" ifadəsindən istifadə etmişdir.[3] Kubrik "Tam metallı jaket" (1987) və "Parıltı" (1980) filmlərində də bu texnikadan istifadə etmişdir.
Film tənqidçiləri Kubrik baxışının dördüncü divarı sındırmaq və qorxunu hiss etdirmək təsirini qeyd etmişdirlər. Robbi Kollin bəzi aktyorların Kubrik baxışı üçün daha uyğun olduqları haqqında yazmışdır, çünki onların üz quruluşu bu texnikadan istifadə etmək üçün daha uyğundur.[4]
Kubrik baxışında aktyor kameraya qaş xəttinin altından baxır və başını kameraya doğru əyir.[5] Aktyorlar səhnədə "gərginliyi" vurğulamaq üçün bu baxışdan istifadə edirlər.[6] Adətən aktyorlar Kubrik baxışından istifadə edərkən bədxah üslubda gülümsəyirlər.[7] Bu, personajın dəli olduğunu vurğulayır. Bu səbəbdən Kubrik baxışı "qorxunc, diksindirici" baxış kimi təsvir olunur.[1] "The Telegraph" nəşri Kubrik baxışını "kinematoqrafiyanın ən çox tanınan kadrlarından biri" adlandırmışdır.[2]
1960-cı ildə buraxılmış "Psixo" filminin son səhnəsində Kubrik baxışını görmək olar.[8] Kubrik baxışının istifadə olunduğu digər filmlərə "Quzuların səssizliyi" (1991), "Donni Darko" (2001), "Betmen" (1989) daxildir.[9] Komiks personajı Coker tez-tez Kubrik baxışı ilə assosiasiya olunur. Belə ki, aktyor Hit Ledcer "Qara cəngavər" (2008) filmində personajı canlandırarkən bu baxışdan tez-tez istifadə etmişdir.[10] "Gülümsəmə" filmi Kubrik baxışına malik olan bir varlığın təqibinə məruz qalan qadından bəhs edir.[11]
"Furiosa: Dəli Meks saqası" filmini analiz edən tənqidçi Manola Dargis gözləri böyük olduğu üçün aktrisa Anya Teylor-Coyun Kubrik baxışından istifadə etməyə uyğun olduğunu qeyd etmişdir.[12] Film tənqidçisi Rocer Ebert "Tam metallı jaket" filmində Kubrik baxışı texnikasından istifadə edilməsini tənqid etmişdir.[13]
 |
 |
UREYIM.AZ |  |
 |
|