Nadirin Siminden Ayrilmasi Film 2011 - Wikipedia - Ureyim.az

Nadir və Simin 11 yaşlı qızları Tirmə ilə Tehranda yaşayır. Şəhərli orta sinif təbəqəsinə aid olan bu ailə dağılmaq üzrədir. Simin Tirmənin İranda böyüməsinini istəmədiyi üçün ailəlikcə ölkəni tərk etmək qərarına gəlir. Lakin Nadir ailə ilə bir evdə yaşayan və Alzheimer xəstəsi olan yaşlı atasına görə getməyə razılaşmır. Nadirin inadkarlığı Simini o dərəcədə narahat edir ki, o, məhkəməyə müraciət edib Nadirdən boşanmağı və Tirmə ilə ölkəni tərk etmək icazəsi tələb edir. Nadir qızının ölkəni tərk etməyi üçün razılıq verməyəcəyini bildirir, və beləliklə məhkəmə Siminin müraciətini rədd edir.

Yoldaşından incimiş Simin valideynlərinin evinə qayıtmaq istəyir, lakin qayıtmazdan əvvəl, xəstə qayınatasına qulluq edə biləcək ev işçisi axtarır. Onun məsləhəti ilə Nadir Raziyə adlı gənc, kasıb və olduqca dindar bir qadını işə götürür. Raziyənin əsəbi xasiyyətli yoldaşı Höccət artıq neçə aydır işsiz qaldığından ailə pula möhtac vəziyyətindədir, odur ki Raziyə, hamilə olduğuna və yolu uzaq olduğuna baxmayaraq, yoldaşının xəbəri olmadan təklifi qəbul edir. Hər ehtimala qarşı Nadirgilə dördyaşlı qızı ilə birlikdə gedir.

Siminin evdən köçməsi ərəfəsində evlərindən əşya daşıyan fəhlələr zəhmət haqqının kifayət olmadığından gileylənir. Simin ailənin yataq otağında gizlədilmiş pul ehtiyatından tələb olunan məbləği ayırıb fəhlələrə ödəyir, qalan pulu isə Nadirin xəbəri olmadan özü ilə aparır.

Bir gün Nadir evə qayıdıb Raziyəni evdə tapmır; evə daxil olub atasını yataq otağında, döşəmədə, qolları yatağa bağlanmış və bihuş vəziyyətdə tapır. Yataq otağındakı pul ehtiyatından Raziyənin zəhmət haqqını verib ona bir də bu evə gəlməməyi tapşırmaq qərarına gələndə, birdən pulun yerində olmadığını aşkar edir. Bu arada Raziyə qayıdır, və Nadir onu atasını tək qoyub getməsindən ötrü danlayıb, üstəlik pulun oğurlamasında günahlandırır. Raziyə günahsız olduğunu iddia edir və çıxıb getməzdən əvvəl həmin gün ona düşən zəhmət haqqını tələb edir. Çox əsəbiləşən Nadir pul vermədən Raziyəni qapıdan eşiyə itələyib evdən qovur.

Həmin axşam Raziyənin baldızı Siminə zəng vurub Raziyənin Nadir tərəfindən döyüldüyünü və xəstəxanaya aparıldığını bildirir. Özlərini xəstəxanaya yetirən Nadir ilə Simin öyrənirlər ki, Raziyənin hamilə olduğu uşaq vəfat edib. Raziyə və yoldaşı iddia edirlər ki, Nadir Raziyəni qapıdan eşiyə itələyəndə, Raziyə pilləkənin üstünə yıxılıb uşağı salmışdır. Buna görə Nadiri məhkəməyə verirlər. Əgər məhkəmə Nadiri günahkar bilsə, o bir ildən üç ilə qədər həbs cəzası ilə üzləşəcək. Nadir dönə-dönə Raziyənin hamiləliyindən bixəbər olduğunu söyləyir. Nadiri haqlı çıxaran bir ifadəni Tirməyə dərs keçmək məqsədilə evlərinə gələn və Raziyə ilə qısa söhbət əsnasında ona qadın məsləhətxanasının telefon nömrəsini təqdim edən müəllimə verir: onun sözlərinə görə, həmin an mətbəxdə olan Nadir bu söhbəti eşidə bilməzdi. Höccətin aqressiv reaksiyasına baxmayaraq, müəllimə öz ifadəsi üstündə durur və Nadiri hakimə tərifləyir.

Daha sonra Nadir qəflətən Raziyənin qızından öyrənir ki, hadisə günü Raziyə evi həkim qəbuluna getmək səbəbilə tərk edibmiş. Bu xəbər və Höccətin əsəbi davranışı Nadiri əslində uşağın Höccətin Raziyəyə zor tətbiq etdiyi nəticəsində itirildiyi haqda düşündürür. Bunu yoxlamaq üçün Nadir Tirmənin müəlliməsi ilə əlaqə saxlayıb onun Raziyəyə verdiyi qadın məsləhətxanasının telefon nömrəsini öyrənmək istəyir. Bu söhbəti eşidən Tirmə anlayır ki, atası Raziyənin hamilə olduğundan hələ hadisədən əvvəl xəbərdar imiş. Dəhşətə gəlmiş müəllimə isə Nadirin müraciətini cavabsız qoyub, o biri gün məhkəməyə yollanır və Nadirin xeyrinə verdiyi ifadəni geri alır. Nadir Tirməyə həqiqəti etiraf etsə də, tutduğu mövqedə duracağını israr edir. O, Tirməyə başa salır ki, məhkəmə onun yalanını ifşa etsə, o, qızından uzun müddət ayrılmaq məcburiyyətində qalacaq.

Tirmə atasını qorumaq üçün bilə-bilə məhkəmədə yanlış ifadə verib bildirir ki, müəllimə ilə Raziyənin arasında baş vermiş söhbətə atası şahid olmamışdır. Bundan xəbər tutan Simin qızının təhlükəsizliyindən ciddi narahat olur və yoldaşının xəbəri olmadan Raziyə və Höccət ilə itkini qarşılamaq üçün maddi razılaşmaya gəlməyə çalışır. Onun fikrincə, bu yolla həm Nadir həbsdən yaxasını qurtarır, həm də Höccət borclarını qaytarmaq imkanını əldə edir. Nadir Siminlə bu haqda xeyli söhbət edib qəbul edir ki, ailənin təhlükəsizliyi naminə Raziyənin hamiləliyindən xəbəri olduğunu boynuna alıb qarşı tərəfə təzminat ödəsin. Raziyənin isə, əksinə, Nadirin günahkar olduğu haqda ciddi şübhələri var imiş. Nadirgildə işlədiyi zaman Nadirin atası evdən xəlvəti çıxıb küçələrə düşəndə, Raziyə onu axtarmağa çıxıbmış. Məlum olur ki, həmin gün Raziyəni avtomobil vurub və o, ilk ağrılarını da həmin günün gecəsi yaşayıbmış.

Sonda hər iki ailə, həmçinin Höccətin borc verənləri, Raziyə ilə Höccətin evinə toplaşır. Ancaq Nadir, Raziyənin olduqca dindar olduğunu xatırlayaraq, son anda Raziyədən tələb edir ki, o, məhz Nadirin güc tətbiq etməsi nəticəsində uşağı itirdiyinə Qurana and içsin. Raziyə isə, Höccətin israrlarına baxmayaraq, günaha batmaq qorxusundan and içməkdən imtina edir. Beləliklə, saziş baş tutmur, Nadir isə günahsız olduğununa dair ciddi sübut əldə edir.

Nadir və Simin təkrar boşanma iddiası irəli sürür. Məhkəməyə geydikləri qara paltarlar ehtimalla Nadirin vəfat etmiş atasının yasını tutduqlarını göstərir. Hakim cütlüyün verdiyi boşanma ərizəsini təsdiqləyir və Tirmədən valideynlərinin hansı biri ilə qalmaq istəyəcəyini soruşur. Gözü yaşlı qızcığaz qərar verdiyini, amma qərarını söyləyərkən ana və atasının eşikdə gözləməsini xahiş edir. Nadir və Simin Tirmənin qərarını bilmək üçün dəhlizdə gözləyərkən film bitir.

Leyla Hatəmi (Simin)

Peyman Məadi (Nadir)

Sarina Fərhadi (Tirmə)

Sarə Bayat (Raziyə)

Şəhab Hüseyni (Höccət)

Kimya Hüseyni (Sümayyə)

Merila Zareyi (xanım Qəhrayi)

Babək Kərimi (hakim)

Şirin Yəzdanbəxş (Siminin anası)

Ələsgər Şahbazi (Nadirin atası)