Vikipediya Inzibatci Muzakiresi Arxiv 2012 - Wikipedia - Ureyim.az

İdarəçi həmkarlarımdan xahiş edirəm ki, mənim sildiyim ərəb qrafikası ilə yazılan Vikipediya və Şablonlar adlar fəzalarındakı səhifələri bərpa etməyə tələsməsinlər. Silmənin yaratdığı texniki problemləri özüm həll edəcəm. Sonradan bərpada ümumi standartlaşdırmanı və məzmun uyğunluğunu təmin edəcəm.--Sortilegus 22:31, 26 yanvar 2012 (UTC)

Hörmətli idarəçi həmkarlarım. Artıq belə görürəm ki, mənim sizlərə bu tip müraciətlərim ənənə halını alıb (və bu əslində çox pis, qeyri-demokratik ənənədir), ona görə ənənəni "pozmayaraq" yeni idarəçi namizədlərinə münasibət bildirmənizi sizdən xahiş edirəm. Mən azvikidə son istifadəçi fəallığını nəzərə alaraq 2 bizim dəyərli keçmiş idarəçi həmkarımıza statuslarının qaytarılması (yeni idarəçi seçkisinin təşkili) üçün səsvermənin keçirilməsini təklif edirəm. Bunlar Vago (müzakirə • töhfələr • statistikalar) və MrArifnajafov (müzakirə • töhfələr • statistikalar)-dur. Ümid edirəm ki, namizədliklərinin irəli sürülməsinə onlardan razılıq istəsək, imtina etməzlər (ümid sonda ölür). İdarəçiliyə digər bir dəyərli namizəd kimi mən Baskervill (müzakirə • töhfələr • statistikalar)-i görürəm. Onunla bu haqda müzakirə səhifələrimizdə müzakirə aparmışıq (yəqin ki, siz də bu müzakirələri oxumusuz). Baskervill-in idarəçiliyi bir çox texniki problemlərin həllində bizə yardımçi ola bilər. İdarəçiliyə digər bir namizəd kimi mən Orartu (müzakirə • töhfələr • statistikalar)-nu görürəm. Məncə bizim “donmuş” idarəçimiz Mehrdad (müzakirə • töhfələr • statistikalar)-ı o tam əvəz edə bilər və ərəb əlifbası ilə yazılan məqalələrə nəzarəti gücləndirər. Bu bizim üçün çox vacib məsələdir.

Son nəticədə bizim burda yazdığımız fikirlər heç nə həll etmir - çünki istənilən fəal azviki istifadəçisi idarəçiliyə namizədliyini irəli sürə və vikiqaydalara uyğun şəkildə idarəçi seçilə və ya seçilməyə bilər. Amma azvikinin idarəçiləri təcrübəli vikipediyaçılardır. Ona görə bu 4 təcrübəli istifadəçiyə müraciət etməmişdən əvvəl sizin fikrinizi bilmək istədim. Çox xahiş edirəm ki, yaxın 2-3 gün ərzində münasibət bildirin. Sevgi və sayğılarla:--Sortilegus (talk) 18:24, 11 aprel 2012 (UTC)

  Vago, MrArifnajafov, Baskervill və Orartu kifayət qədər aktiv və təcrübəli istifadəçidir. Onların idarəçi namizədi olmalarına etiraz etmirəm. --►Safir yüzüklü Cekli^mesaj 03:58, 12 aprel 2012 (UTC)

  Vago ilə MrArifnajafovun iş prinsipləri ilə bizlərin bir çoxu artıq tanış olduğundan əlavə izahata ehtiyac duymuram. Baskervill və Orartu isə Azvikinin ən fəal istifadəçilərindən biridirlər. Onların iadarəçi statusu almaları məncə Azviki üçün dəyərli olar. Orartu xanım ərəb qrafikalı məqalələrə nəzarət etməkdə bizlərə yaxın köməkçi olardı. Bu mənim şəxsi fikirlərimdir, əsas sözü isə onların özləri deyə bilərlər. -- ■ Sultan ^mesaj 14:43, 13 aprel 2012 (UTC)

MrArifnajafov və Vago əvvəllər də idarəçi olduqları üçün, yenidən idarəçiliyə qayıtmaqları azvikiyə ancaq xeyir gətirə biləcəyini düşünürəm. Digər iki istifadəçi, Baskervill və Orartu da kifayət qədər təcrübəyə malikdirlər. Məncə azvikinin daha da canlanması üçün yeni idarəçilərə ehtiyac var. Hamıya uğurlar. Hörmətlə, -- Pərviz   08:35, 15 aprel 2012 (UTC)

Həmkarlarımı, xüsusilə bizim sıramıza yeni (və yenidən) qoşulmuş idarəçi dostları salamlayıram. Yeni idarəçilərimizdən biri - MrArifnajafov artıq idarəçilik təcrübəsinə malikdir. Ona görə burda yazacağım bəzi texniki izahları o oxumasa da olar:) 2 həmkarımızın (Baskervill və Orartu) isə idarəçilik sahəsində təcrübəsi yoxdur, ona görə onlardan xahiş edirəm ki, müzakirə edilən məsələ ilə bağlı qərar verməmişdən əvvəl burda qeyd edəcəyim bəzi daxili keçidləri, statistik göstəriciləri yaxşı-yaxşı təftiş etsinlər. Əslində, idarəçilik çox böyük məsuliyyətdir. Və 1 idarəçinin qayda-qanunları qulaq ardına vurması, "mən belə deyirəm", "mən belə qərar verirəm", "mən haqlıyam" kimi iddiaları bizim viki kimi kiçik vikilərin fəaliyyətini tam iflic edə bilər. Ona görə ilk növbədə idarəçilər kimi onu bilməliyik ki, biz 1 komandayıq və mübahisəli məsələlərin həllində "biz belə deyirik", "biz belə qərar veririk" və "biz haqlıyıq". Bu o deməkdir ki, bütün əhəmiyyətli mübahisəli məsələlər (bizim "idarəçi müzakirəsi" səhifəsinə gəlib çıxan) bizim konsensusumuz əsasında həll olunmalıdır və biz məsuliyyəti bölüşməliyik. Yeni idarəçilərə deyim ki, azvikidə bir qayda olaraq idarəçi və bürokrat seçkiləri (statusun verilməsi və alınması) və yeni prinsiplərin qəbulu ilə bağlı səsvermələr "hay-küylü" keçir. Çox az halda "seçilmiş məqalə" və "seçilmiş şəkil" səsvermələrinə müdaxilə etmək lazım gəlir. Bir mübahisəli məsələ də istifadəçilərin bloklanması ilə bağlı məsələ olur ki, bunu indi sizin müzakirənizə çıxarmaq istəyirəm. 2 istifadəçinin blok müddətinin qaldırılması və ya azaldılması son vaxtlar bizim vikicəmiyyətdə kəskin müzakirələr doğurub (bu müzakirələrdə bizim bəzi idarəçilər də iştirak edib). Hətta onlardan birinin 1 illik blokunun qaldırılmasını təklif edən digər istifadəçi özü qeyri-müəyyən müddətə bloklanıb (mənim tərəfimdən). Bir sözlə, siz blok müddəti 13 oktyabr 2012-ci ildə bitən Мурад 97 (müzakirə • töhfələr • statistikalar) və qeyri-müəyyən müddətə bloklanmış Rovshan.95 (müzakirə • töhfələr • statistikalar)-in blok müddətlərinin qalması, azaldılması və ya ləğvi ilə əlaqədar nə təklif edirsiniz? Bununla bağlı xahiş edirəm qısa zamanda fikirlərinizi burda bildirin (bloklanma ilə razı olmanız və ya bloklanmanı tam qaldırmağı təklif etməniz və ya bloku konkret hansı tarixə qədər azaltmaq istəməniz barədə). Bir də mütləq istifadəçinin fəaliyyət statistikasını təftiş edin ki, tam mənzərə ilə tanış olasınız. Hörmətlə:--Sortilegus (talk) 20:17, 8 may 2012 (UTC)

Мурад 97 (müzakirə • töhfələr • statistikalar)-ın kənd meydanında kril əlifbası ilə bağlı olan məsələsini bir daha oxudum. Sözün düzü mən Muradın elə o vaxta bloklanmasını düzgün hesab etmirdim. Doğrudur onun tərəfindən bir sıra ciddi qayda pozuntuları olmuşdu. Buna görə onu 1 həftəlik bloklamaqda olardı, ancaq 1 illik blok seçildi. Mən özüm bir dəfə 1 günlük bloklanmışdım və bu bloklanmadan dərs aldım. Əgər Muradda 1 həftəlik bloklansaydı düşünürəm ki, oda bundan dərs alardı. Muradın bloklanmadan sonra bir neçə dəfə müxtəlif şəxslər vasitəsi ilə blokunun açılması barədə rica etməsi, peşman olmasını bildirməsinin şahidi olmuşuq. Murad artıq 8 aydır ki, bloklanıb. Əgər bir şəxs öz blok müddətinin böyük bir qismini keçiribsə, onun blokunun açılmasının viki cəmiyyətdə bir çox şəxs istəyirsə blok nədən açılmasın??? Azvikidə aktiv vikipedistlərin sayı çox azdır. Əgər bizdə 20 yox, 100 nəfər aktiv və peşakər vikipedist olsaydı hardasa sərt qərarları tətbiq etmək olardı. Əlimizdə olan qalan vikipedistlərin bu şəkildə bloklanması kökündən yanlışdır. Bir adam bir səhv edibsə, cəzasının çoxunu çəkibsə və ən əsası peşmandırsa həmin şəxsi viki cəmiyyətə qəbul etməmək böyük insafsızlıq olar. Rovshan.95 (müzakirə • töhfələr • statistikalar)-in məsələsi isə bir az fərqlidir. Rövşən kənd meydanında hər zaman sərt fikirləri ilə seçilib. Ancaq onun tərəfindən Kənd meydanında yazılan son yazılarda təhqir yox, sərt şəkildə tənqid var. Əgər idarəçimiz Wertuose Rövşənə 2 həftəlik blok tətbiq etmişdisə, sonrada həmin blokun ömürlük blok ilə əvəzlənməsidə doğru addım deyil. Belə ki, Rövşən 2 həftəlik bloklanmasıa səbəb olacaq sözü Wertuose ünvanlamışdır. Oda bunun əvəzində Rövşəni 2 həftəlik bloklamışdı. Hörməli Sortilegus isə bloku ömürlük ilə əvəz etdi. Şəxsən mənə belə məlum olur ki, Rövşənin burada birdən çox idarəçi ilə problemi var. Əks halda Qeyri-müəyyən müddətə bloklanmazdı. Təklif edirəm ki, Rovshan.95 (müzakirə • töhfələr • statistikalar)-ə Wertuose tərəfindən qoyulan blok tətbiq edilsin. Hörmətlə:--Baskervill (talk) 11:59, 9 may 2012 (UTC)

Kənd meydanında artıq yazdığım mövqeni burada da təkrarlamaq istəyirəm:

Polemikalara girmədən təklif edirəm :

1. Rövşən emosiyalalara son qoysun və onun blokunun açılması məsələsi müəyyən müddətdən sonra baxılsın.

2.Muradın blokunun vaxtından əvvəl açılmasına etiraz etmirəm. Qoy hansısa bir İP-dən bura vikipediya qaydaları ilə fəaliyyət göstərəcəyi barədə bir mesaj yazsın. Əvvəl iki həftəliyə sınaq müddəti ilə bloku açaq, kollektiv razı qalarsa ( bu zaman bloklayan idarəçi hər hansı bir mövqe bildirməsin), sınaq müddəti daha iki ay uzadılsın. Yenidən etiraz olmazsa blok tamamilə götürülsün.

3. Hamıdan xahiş edirəm, qarşılıqlı ittiham metodundan əl çəkək.

4. Yeni məqalələrin yaradılması tempi zəifləyib. Hər bir kəsdən daha çox maraq göstərdiyi sahə üzrə fəallığı artırmağı təklif edirəm. Hamıya hörmətlə--Acategory (talk) 12:48, 9 may 2012 (UTC)

Digər idarəçilər də fikirlərini bildirsinlər, sonra ümumi qərar qəbul edək. Мурад 97 (müzakirə • töhfələr • statistikalar) azvikinin kiril əlifbasında olmasını təklif etməyinə görə bloklanmayıb. Əsasən burda xəbərdarlıqları qulaqardına vurduğuna, öz mövqeyini haqlı tutub, öz dediyini həyata keçirməklə bağlı təhdidlərinə, müzakirələrdəki kobudluğuna görə bloklanıb. Amma onu bloklayan idarəçi də blokun qaldırılmasında problem görmürsə, mən təklif edirəm ki, iyunun 13-də blokunu sınaq müddəti kimi qaldıraq. Yəni 1 illik blokunun 2/3 müddəti tamam olanda. Rovshan.95 (müzakirə • töhfələr • statistikalar) ilə bağlı məsələ fərqlidir. Bu istifadəçi sadəcə digər istifadəçilərə qarşı hörmətsizlik etməklə, təhqirlər yağdırmaqla, idarəçiləri ittiham etməklə məşğuldur. Və belə görünür ki, bundan xüsusi zövq alır. Mənim fikrimcə islah olunmaz istifadəçidir. Buna görə də bu günə qədər çox sayda bloklanıb. Bloklanma qeydlərinə baxa bilərsiz. Lap bu gün blokunu qaldıraq - 1 həftədən, 1 aydan sonra da eyni hərəktləri edəcək və yenə bloklanacaq. Necə ki, dəfələrlə bu baş verib. Belə istifadəçilərə qarşı qısamüddətli blok heç bir effekt vermir. --Sortilegus (talk) 09:21, 10 may 2012 (UTC)

Rövşənə axırıncı şansı verək, 2 həftəlik bloku saxlayaq. Əgər yenə nəticə çıxarmasa, mən özüm onu müddətsiz bloklayaram. Məncə o artıq vəziyyətin nə qədər ciddi olduğunu başa düşür. --Irada (talk) 09:29, 10 may 2012 (UTC)

Əslində, mən ən son variant kimi onun blokunun 1 il müddətinə endirilməsini qəbul edə bilərəm. Amma əgər İradə xanım, bu məsuliyyəti öz üzərinizə götürürsünüzsə, mən sizin təklif etdiyiniz variantı da qəbul etməyə hazıram. Ancaq özünüz şahid olacaqsınız ki, bunun xeyri yoxdur.--Sortilegus (talk) 09:46, 10 may 2012 (UTC)

Mənim sözümü yerə salmadığınıza görə çox təşəkkür edirəm və məsuliyyəti boynuma götürürəm. Söz verdiyim kimi kiçicik bir istehza və ya təhqir müddətsiz bloklanmasına səbəb olacaqdır. --Irada (talk) 09:50, 10 may 2012 (UTC)

Hörmətli həmkarlarlar üzürlü səbəbdən müzakirəyə gec qatıldığım üçün məni bağışlayın.Мурад 97 (müzakirə • töhfələr • statistikalar)-nin blokunun vaxtından əvvəl açılmasına məndə etiraz etmirəm. Buna səbəb müxtəlif vaxtlarda Muradın bir neçə şəxs vasitəsi ilə blokunun ləğv edilməsini istəməsidir, hərçənd mən bu müraciətlərlə şəxsən tanış deyiləm. Ancaq bunun üçün istifadəçi hər hansı bir İP-dən başqa səhifələrdə olan müzakirələrdə iştirak etməmək şərti ilə İdarəçilərə müraciət etməsi məqsədə uyğun olardı, nəinki başqa istifadəçilərə.

Həmkarımız Rovshan.95 (müzakirə • töhfələr • statistikalar)-in son zamanlar digər istifadəçilərlə, əsasəndə idarəçilərlə rəftarı hansı səbəbdənsə tez-tez pisləşir. Bu vəziyyəti istifadəçi özü yaradır. Bilmirəm o, bunu bilərəkdən və ya biməyərəkdən edir. Amma hələdə Rövşənin qəlbində vikipediyaya bağlılıq qalmaqdadır. Bunu mən əvvəllər onunla virtual münasibətlər zamanı hiss etmişəm. Bu səbəbdən, həmçinin həmkarımız İradə xanımın bu cür məsuliyyətli bir işi öz üzərinə götürməsi səbəbindən Rövşənində blokunun açılmasını dəstəkləyirəm. Ancaq bu blokların ləğv edilməsinin nə dərəcədə effektiv olacağını əvvəlcədən söyləmək mümkün olmasada, ümid etməyə dəyər. -- ■ Sultan ^mesaj 20:34, 13 may 2012 (UTC)

Bir təklifim var, bununla bağlı sizin fikirlərinizi bilmək istərdim. Təklif edirəm ki, Bakıda Avroviziya Mahnı Müsabiqəsi keçirilən müddətdə ana səhifəyə "həftənin seçilmiş məqaləsi" bölməsinə 2012 Avroviziya Mahnı Müsabiqəsi məqaləsini yerləşdirək. Məqalənin seçilmiş məqalə statusu yoxdur. Amma məncə, istisna hal kimi bunu ümumi razılığa gəlib edə bilərik. Vaxt az olduğuna görə xahiş edirəm fikirlərinizi 2-3 günə bildirəsiniz. Məqaləni də müəyyən qədər təkmilləşdirmək lazımdır. İstanadlarda çoxlu texniki problem var, onları aradan qaldırmaq gərəkdir. --Sortilegus (talk) 16:57, 12 may 2012 (UTC)

Təklifi müdafiə edirəm. Eyni zamanda paralel surətdə məqalənin seçilmiş məqalə statusu üzərində işləyək.--Acategory (talk) 18:10, 12 may 2012 (UTC)

Eyni zamanda finalın qurtarmasını da gözləmək lazımdır. Beləki ki, nəticə olmadam məqaləyə seçilmiş məqalə statusu versək də, sonradan onun üzərində xeyli əlavələr etmək lazım gələcək. --Acategory (talk) 18:14, 12 may 2012 (UTC)

Məndə bu təklifi dəstəkləyirəm. -- ■ Sultan ^mesaj 19:07, 13 may 2012 (UTC)

Düzdür, seçilmiş məqalə kimi ancaq finaldan - bütün nəticələr bilinəndən sonra hazırlaya bilərik. İstisna hal kimi ana səhifəyə yerləşdirərik. İndiki "həftənin seçilmiş məqaləsi"nin vaxtı bitən kimi bu məqaləni yerləşdirəcəm ana səhifəyə. Təxminən mayın 21-22-nə düşəcək və 28-nə qədər ana səhifədə qalacaq. Həmin ərəfədə bu məqalə təkcə Azərbaycandilli internet məkanında deyil (axtarış sistemlərinin hesabına), bütün vikipediya şəbəkəsində də (vikipediyadaxili keçidlər sayəsində) ən çox oxunan məqalələrdən olacaq. Türklər demişkən, rekor qıracaq:) Bu səbəbdən 100% vandalizm halları da artacaq. Ona görə məqaləni tam mühafizə etmək lazım gələcək və istifadəçilərin məqaləni redaktə etmək imkanları olmayacaq. İdarəçilər yarımfinalların və finalın nəticələri məlum olan kimi gərək məlumatları yeniləsinlər. Çalışacam bu işi tam öz üzərimə götürüm. --Sortilegus (talk) 12:59, 14 may 2012 (UTC)

Salam əziz və dəyərli idarəçi həmkarlarım. Artıq "oturuşmuş" ənənəni pozmayaraq (idarəçiliyə namizədləri bir qayda olaraq bürokratın irəli sürməsi ənənəsini) sizin müzakirənizə 2 istifadəçinin idarəçiliyə namizədliyi məsələsini təqdim edirəm. Bunlar bizim həmkarlarımız Vusal1981 (müzakirə • töhfələr • statistikalar) və Vugar 1981 (müzakirə • töhfələr • statistikalar) adlı istifadəçilərdir. Hər iki istifadəçinin adındakı "1981" yazısı sizi çaşdırmasın. Doğum illəri eyni olsa da, vikipediya "dili" ilə desək "kukla" deyillər. Bu günə qədər mən ən azı 10-12 dəfə belə məsuliyyəti üzərimə götürərək bu addımı atmışam - yəni azvikinin idarəçiliyinə fəal istifadəçilərin namizədliyini irəli sürmüşəm. Bu, çox böyük məsuliyyətdir. Demək olar ki, heç vaxt yanılmamışam. Olub ki, idarəçiliyə namizədliyini irəli sürdüyüm istifadəçi sonralar burda aktiv fəaliyyət göstərməyib. Amma bir idarəçi kimi fəaliyyət göstərən bu istifadəçilərin heç biri azvikiyə zərər vurmayıblar. Bu gün mən haqqında çox düşündüyüm, götür-qoy etdiyim bir qərarımı sizinlə bölüşürəm. Xüsusilə, Vüsalın idarəçiliyə namizədliyini irəli sürməyim bilirəm ki, bəzilərini qıcıqlandıracaq. Amma mən bunu bizim azvikidə işlək olan Vikipediya:İdarəçilərin və bürokratların seçilməsi qaydaları prinsipinə uyğun olaraq edirəm və düşünürəm ki, fəaliyyətə başladığı dövrdən azvikiyə bu istifadəçidən çox töhfə verən istifadəçi olmayıb. Düzdür, onun fəaliyyətində mənim də razı olmadığım bəzi məqamlar var (mənim fəaliyyətimdə belə məqamlar bəlkə daha çoxdur - kim bilir?). Hətta, Vüsal 4 dəfə azvikidə bloklanıb da. Bizim 2 il bundan qabaqkı qanuna uyğun olaraq o idarəçiliyə namizəd ola bilməzdi. İndi belə bir imkan yaranıb və o imkandan ilk növbədə istifadəçinin özü yox, mən yararlanıram. Vüqar isə vikimedia fondunun digər layihəsi olan Vikimənbənin idarəçisidir. Kifayət qədər təcrübəli vikipediyaçıdır. Elə idarəçi olmaya-olmaya da burda idarəçilərə xeyli kömək edir. Xahiş edirəm, bu 2 istifadəçinin idarəçiliyə namizədliyi məsələsinə 4-5 gün ərzində burda fikir bildirəsiniz (əgər özləri namizədliklərinin irəli sürülməsinə etiraz etməsələr). Sonra mən hər iki istifadəçiyə idarəçiliyə namizəd olmalarını təklif edib səsverməni başladım. Hörmətlə:--Sortilegus (talk) 21:15, 30 iyun 2012 (UTC)

Hər iki dostumuzun namizədliyini dəstəkləyirəm. Vikipediyaya töhvə verən və təsrübəli yoldaşlardır. Ancaq adlarının oxşarlıqları tez-tez çaşqınlıq yaradır. Təklif edirəm ki, (təkid etmirəm) ya adlarını dəyişsinlər, ya da korrektə etsinlər.--Acategory (talk) 05:32, 1 iyul 2012 (UTC)

Hər iki təcrübəli həmkarımızın namizədliyini dəstəkləyirəm.Onların iadarəçi statusu almaları Azviki üçün dəyərli olar. Hörmətlə:--Orartu (talk) 05:11, 2 iyul 2012 (UTC)

İdarəçi namizədləri təcrübəli istifadəçilər arasından seçildiyinə görə həmin namizədlərin burdakı müzakirələrdə, səsvermələrdə iştirak göstəriciləri də yüksək olur. İstifadəçi adı dəyişdirilsə də istifadəçinin müzakirə səhifələrində əvvəlki istifadəçi imzaları olduğu kimi qalır. Digər tərəfdən qlobal qeydiyyatdan keçən istifadəçilər üçün istifadəçi adı dəyişmə çox uzun bir prosesdir. Mən elə düşünmürəm ki, bizim azvikiçilər üçün "Vusal" və "Vugar" imzalarını qarışıq salmaq problemi ola. Hörmətlə: --Sortilegus (talk) 11:27, 3 iyul 2012 (UTC)

Hər iki şəxsi virtual şəkildə də olsa tanıyıram. Vüsal bəy, Youtubeda Azərbaycan kinosu üçün əvəz olunmaz işlər görüb və onun Azvikidə olan fəaliyyətidə Youtube-da olan fəaliyyətindən heç geri qalmır. Vüqar bəy isə vikimənbədə idarəçi olmaqla yanaşı eyni zamanda inkubatordada idarəçidir. Vüqar bəyin fəaliyyətini hər zaman bəyənmişəm. Vüsal bəyində Azviki ilə tanışlığından uzun müddət keçib. Hər iki şəxsin istifadəçi adlarında müəyyən oxşarlıq olsada fikirimcə bu elədə bir problem yaratmaz. Azvikidə idarəçilərin sayının artmasına sadəcə sevinmək olar.:Hörmətlə--Baskervill✍ 12:33, 3 iyul 2012 (UTC)

Hər iki həmkarımız təcrübəli istifadəçilərdir. İstifadəçi Vugar 1981 vikimənbədə, inkubatorda, vikimedia fondunda və Vikipediyanın digər sahələrində çalışmaqla yanaşı hər zaman AzVikidə idarəçilərin işinə yardımçı olmağa çalışmışdır. İstifadəçi Vusal1981 isə uzun müddətdir bir istifadəçi kimi fəaliyyət göstərir. Təcrübəli istifadəçidir. Hər iki istifadəçinin idarəçiliyə namizədliyi məsələsini dəstəkləyirəm. Ancaq əvvəlcə onların özlərinin bu məsələyə münasibətini bilmək pis olmazdı. -- ■ Sultan ^mesaj 13:01, 3 iyul 2012 (UTC)

Salam. Bir məsələni idarəçi həmkarlarımın diqqətinə çatdırmaq istərdim. Bu məsələni yenidən gündəmə gətirməklə aktiv idarəçilər arasında bölgünün yeniləməsini təklif edirəm. Aparılan belə müvəqqəti bölgü məncə Azərbaycandilli Vikipediyada idarəçi nəzarətinin gücləndirilməsinə öz təsirini göstərəcək. Hörmətlə:-- ■ Sultan ^mesaj 20:06, 20 iyul 2012 (UTC)

Yaxşı fikirdi. Daha da yaxşısı o olar ki, idarəçiləri qruplara bölək və hər qrupun öz vəzifəsi olsun, bir idarəçi olmayanda həmin qrupdakı başqa idarəçi onu əvəz edə bilsin. Təbii ki, başqa işlərə də müdaxilə edə bilərlər, amma əsas nəzarət obyektlərini bilsinlər ki, Vikipediyaya daha rahat nəzarət etmək mümkün olsun. Əksəriyyət razı olsa, tətbiq etmək olar. Wertuose (talk) 22:08, 21 iyul 2012 (UTC)

Təklif edirəm ki, hər həftəyə bir idarəçini məsul edək. O ana səhifənin hazırlanmasına, kənd meydanında qaldırılan məslələrin operativ həllinə cavabdeh olsun. Qruplara gəldikdə isə bu şərtidir, idarəçilərin daha yaxşı bacardıqları sahələrlə məşğul olması daha çox fayda verir.--Acategory (talk) 06:53, 22 iyul 2012 (UTC)

Hər həftəyə 1 idarəçini məsul etmək bir az çətin olacaq. Birdən məsul idarəçinin qəfil işi çıxa bilər, sayta daxil ola bilməz və s. Əslində biz neçə ildir ana səhifənin fəaliyyətini mexanikiləşdirə bilmirik. Bunu etsək, heç ana səhifəyə idarəçi nəzarəti lazım deyil. "Seçilmiş məqalə", "Seçilmiş şəkil", "Tarixdə bu gün", "Bilirsinizmi" bölmələrinin 1 illik planı tutulmalıdır və artıq yanvarın 1-i bilinməlidir ki, məsələn, sentyabr ayının 1-də ana səhifədə hansı materiallar olacaq. İdarəçilərin iş bölgüsünə gəlincə, bu ideyanı yenidən gerçəkləşdirməyə cəhd etmək olar. Amma aktiv idarəçilərin sayı artdığına görə bölgü yenidən aparılmalıdır. Bəlkə birinci əsas vəzifələri müəyyənləşdirək, sonra o vəzifələri öz razılıqları əsasında idarəçilər arasında bölüşdürək?--Sortilegus (talk) 13:39, 31 iyul 2012 (UTC)

Əvvəlcə vəzifələrin müəyyənləşdirilməsi yaxşı fikirdir. İdarəçilərin qruplara bölgüsü də təbii ki, şərti olmalıdır. Yəni bir işi bir nəfərə yox, bir qrup işi bir qrup idarəçiyə həvalə etmək lazımdır. Belə olsa, daha rahat olar. Wertuose (talk) 21:03, 31 iyul 2012 (UTC)

Salam. E THP (müzakirə • töhfələr • statistikalar) adlı istifadəçi son 1 ay ərzində müxtəlif şablonlara ərəb əlifbasındakı məqalələrin adlarını əlavə edir. Bildiyiniz kimi bu həssas mövzudur və buna vikicəmiyyətin razılığı mütləq olmalıdır. Bu barədə hansısa bir razılıq əldə olunubmu, yoxsa istifadəçi bunu öz istəyi ilə edir? Əgər öz istəyinə görə edirsə, niyə bununla bağlı indiyə kimi tədbir görülməyib, yox əgər vikicəmiyyətin razılığı varsa, onda hansı səhifədə müzakirə və səsvermə aparıldığını bilmək istərdim. Hörmətlə, Wertuose (talk) 23:12, 20 iyul 2012 (UTC)

İndi istifadəçinin redaktələrinə baxdıqca görürəm ki, bu prosesi uzun müddətdir ki, yavaş-yavaş həyata keçirir və demək olar ki, bu fəaliyyəti ilə şablonların adi oxucu üçün yararsız hala düşməsinə səbəb olur. Bunu hansı əsasla etdiyi mənə çox maraqlıdır. İstifadəçinin son 5-6 ayda 19 müxtəlif şablona etdiyi əlavələri geri qaytardım. Ərəb əlifbası ilə yeni şablonlar yaratması üçün sadəcə mənim geri qaytardığım mətni kopyalayıb yeni yaradacağı şablona qoyması və latın əlifbalı məqalələrə keçidləri silməsi kifayətdir. Ona görə də 19 yeni şablon yaratması elə də çətin bir proses deyil. Wertuose (talk) 23:46, 20 iyul 2012 (UTC)

Salam. Ərəb əlifbalı şablonlar ləğv olunub və onların yerində hər iki əlifbalı şablonlar yaradılıb. Bu cür şablonların adları latınla olacaq, amma içində hər iki əlifbadan istifadə ediləcək. Məsələn, {{İran ostanları}} formasında. Bunun bir mənfi tərəfi şablonların mətninin bir az çox olmasıdır. Amma müsbət tərəfləri: həm latınla, həm ərəblə yazılan eyni mövzulu məqalələrin adlarının uyğunlarşdırılmasının asanlaşdırılması (şablon daxilində), şablonların standartlaşdırılması, iki əlifba ilə yazılan eyni mövzulu məqalələrin tapılması, müqayisə edilməsi imkanlarının artması, buna uyğun olaraq da onların zənginləşdirilməsi ehtimallarının çoxalması (latında olan mətni ərəb əlifbasını bilən istifadəçilər ərəblə yazılan məqaləyə əlavə edə biləcəklər və əksinə, eləcə də məqalə təkcə bir əlifbada varsa, onun digər əlifbada yaradılması prosesi stimullaşdırılacaq). --Sortilegus (talk) 20:02, 21 iyul 2012 (UTC)

Amma eyni zamanda da latın əlifbasındakı şablonları mənasız bir şeyə çevirir. Çünki şablon həm böyüyür, həm də bəzilərində ərəb əlifbasındakı adlar latın əlifbasındakı adın yanında yazılır ki, bu da şablonda nə yazıldığını başa düşməyə ümumiyyətlə imkan vermir. Məncə bu işi dayandırmaq lazımdır. Qoy hər əlifbada ayrı şablon yaradılsın. Bu hamının işini asanlaşdırar və Vikipediya istifadəçilərinə mane olmaz. Yoxsa bu variantı tətbiq edəsi olsaq, bunun həm praktiki əhəmiyyəti yoxdur, çünki latın əlifbasını bilən və ərəb əlifbasından xəbəri olmayan şəxs onsuz da girib ərəb əlifbasındakı məqalələri zənginləşdirəsi deyil. Latın əlifbasını yeni öyrənən və bu əlifba ilə yazmağı bilməyən cənublular isə kütləvi şəkildə latın əlifbasında məqalə yaradası deyil. Amma ara yerdə oxucuları itirə bilərik və yeni bir problem yaratmış olarıq ki, sonra bunun altından çıxmaq mümkün olmaz. Wertuose (talk) 20:55, 21 iyul 2012 (UTC)

Məsələ artıq bir problemə çevrilib və özümüz də hiss etmədən iki əlifbalı azərbaycanca vikipediyaya çevrilirik. Bunun faydalı və zərəli tərəflərini ciddi şəkildə müzakirə etməliyik. Yekun nəticəyə qədər isə ərəb əlifbalı şablonların yerləşdirilməsinin dayandırılmasını təklif edirəm.--Acategory (talk) 06:49, 22 iyul 2012 (UTC)

Mən də bu fikirdəyəm ki, hələlik ərəb əlifbası ilə yalnız məqalə yaradılmasına icazə versək daha yaxşı olar. Amma şablonlarla bağlı başqa bir variant da mümkündür. Belə ki, "Göstər/Gizlə" düyməsini eyni şablonda iki dəfə yerləşdirmək olar ki, istifadəçilər əvvəlcə latın əlifbasındakı adları görsünlər və əgər istəsələr latın əlifbasındakı adlardan aşağıda yerləşən ikinci "Göstər" düyməsinə basaraq həm də ərəb əlifbası ilə yazılan adları görə bilsinlər. Bu iki əlifbadakı yazıların bir-birinə qarışmasının qarşısını alar, həm də oxucuların narahatlığını azaldar. Wertuose (talk) 12:28, 22 iyul 2012 (UTC)

Artıq bu ərəb əlifbalı məqalələr və şablonlar Azvikidə həlli olmayan problemə çevrilib. Şəxsən mən Wertuoseun fikirlərini dəstəkləyirəm və özbaşına, kimsəyə xəbər vermədən bu tip məsələlərdə hərəkət etməyi doğru hesab etmirəm. Birdə mən iki və daha çox əlifbalı vikilərdə araşdırma aparıram və kənd meydanında bu məsələdən qurtulmaq üçün yaxın zamanda öz təkliflərimi yazacam. --Baskervill (talk) 14:14, 22 iyul 2012 (UTC)

Wertuose-nin təklifini mən də dəstəkləyirəm. Əgər "Göstər/Gizlə" şəklində iki əlifbalı şablonlar yarada bilsək əla olar. Belə də hələlik yaradılan 2 əlifbalı şablonların sayı çox deyil. O işlə mən məşğul oluram. 50-60 şablon olar. Əlavə də 30-40 yaradılacaq ilkin mərhələdə. Yəni nümunə kimi 1 "Göstər/Gizlə" şablonu olsa, biz o praktikanı 1 həftənin içində köməkləşib 100 şablona tətbiq edərik. --Sortilegus (talk) 13:25, 31 iyul 2012 (UTC)

Hörmətli həmkarlar. Bizim vikidə artıq 3 ildən artıqdır ki, bir "körfəz davası" gedir. Bu məsələ ətrafında xeyli müzakirələr aparılıb və hətta müzakirələr artıq mübahisələrə çevrilib. Məncə, bu məsələyə son qoymaq vaxtıdır. Söhbət latınla yazılan Fars körfəzi və ərəblə olan eyniadlı فارس کورفزی məqaləsindən gedir. Mən bütün müzakirələri oxudum, o müzakirələrdə və məqalələrin özlərində göstərilən mənbələrə baxdım. Bundan başqa körfəzin adının digər dillərdə necə verildiyini öyrənmək üçün intervikilərə nəzər saldım. Bütün bu bilgiləri toplayandan və təftiş edəndən sonra (yəni körfəzşünaslıq elminə yiyələnəndən sonra:)) belə qərara gəldim ki, bizim vikidə körfəzin adı məhz indi olduğu kimi - "Fars körfəzi" olaraq verilsə daha düzgün olar. Oxuduğum şərhlərin bəziləri tam əsassızdır, bəziləri saxta mənbələrə əsaslanıb. İntervikilərə gəlincə - bu körfəz haqqında 93 dildə məqalə var. Mən bu 93 dilin 70-nin əlifbasını oxuya bildim. Onların 66-sında bu körfəzin adı məhz "Fars körfəzi" kimi göstərilib. Türklər "Bəsrə körfəzi", özbəklər "İran körfəzi" yazıblar. Azərbaycanda şəxsən mən televiziyalarda, qəzet, kitab səhifələrində "Fars körfəzi" yazılışına daha çox rast gəlmişəm. Amma məqalələrin müzakirə səhifələrindəki şərhlərə görə ASE-də "İran körfəzi" yazılıb. Özbəklər yəqin bizim ASE-dən götürüblər adlandırmanı:) Bu məsələ ilə bağlı təkbaşına qərar verə bilmədiyimə görə sizin fikirlərinizi öyrənməyi və konsensus əldə edəndən sonra ümumi qərar çıxarmağı daha məqsədəuyğun sayıram. Mənim təklifim: latınla müəyyən qədər məlumat yerləşdirilən, mənbələr artırılan bir "Fars körfəzi" məqaləsi yaradırıq (mövcud məqaləni zənginləşdiririk), sonra bu məqalədəki məlumatları ərəblə məqaləyə köçürürük. İlkin dövrdə hər iki əlifbada olan məqaləni tam mühafizə etmək yaxşı olar.--Sortilegus (talk) 13:04, 23 iyul 2012 (UTC)

Zənnimcə bu məqaləni Körfəz (Asiya) adlandırsaq da yanılmarıq. Google-də ad yazmadan körfəz sözünü axtarsaq böyük ehtimal bu körfəzə düşəcəyik. Bütün beş adlandırmaya dair mənbələr var, amma yalnız biri (İran körfəzi) ASE vasitəsilə etibarlıdır. BMT-də Fars körfəzidir, amma BMT mətnlərinin Azərbaycan dilindəki adlandırmalara birbaşa aidiyyatı yoxdur. Mənbə kimi göstərilən bütün digər mətnlərdə körfəzin adı qısaca (dolayısı ilə) xatırlanıb, mən birbaşa körfəzdən bəhs edən elmi-akademik nəşrləri görmədim. Burada əsas məqam odur ki, bu körfəzin Azərbaycan dilində birmənalı adı yoxdur. Hətta mən müzakirə səhifəsində eyni saytların içərisindəki fərqli adlandırmalara diqqət çəkmişəm. Körfəzin özünə aid məqalənin adında 100 % əminliyim olmasa da bu məqalənin adını həqiqətən də Körfəz ölkələri... şəklində dəyişdirmək lazımdır. Envikidə də belədir, üstəlik təşkilatın rəsmi adında və loqosunda Ərəb körfəzi ifadəsi açıq-aydındır. İlkin variant kimi hər iki məqalənin özünü də, müzakirə səhifəsini də tam mühafizəyə almaq pis olmaz. Digər adminlərin fikrini də öyrənək. --N KOzi ^FORVM 13:22, 23 iyul 2012 (UTC)

Bu məsələ ilə bağlı əvvəlcə özümüz üçün bəzi şeyləri aydınlaşdırmalıyıq ki, müzakirələrdə də bu fikrin ətrafında ortaq mövqe göstərək. "Fars körfəzi" adlandırması hal-hazırda Azərbaycanda ümumişlək adlandırma şəklidir və məncə heç bir təsdiqə ehtiyacı yoxdur. "İran körfəzi" isə belə görünür ki, rus dilindən birbaşa və kobud tərcümənin nəticəsidir ki, bu da ASE-də öz əksini tapıb. Yəni rus dilindəki "Персидский" sözünü İran kimi tərcümə ediblər. Yaxud da ikinci bir versiya da mümkündür ki, 1930-cu illərdə İran dövləti rəsmi olaraq öz adını dəyişərək İran adlanmağa başladığı üçün bəzi alimlərimiz bunu Fars körfəzinin adına da şamil etməyə cəhd ediblər. "Ərəb körfəzi" adlandırması 1960-cı illərdə bir sıra ərəb dövlətlərinin müstəqillik qazanması və ərəb milliyyətçiliyinin artmağa başladığı dövrdə yaranıb. "Kəngər körfəzi" adlandırması ola bilsin ki, qədim dövrlərdə müəyyən bölgələrdə istifadə edilib, amma mənə verilən məlumata görə hal-hazırda Cənubda bu adlandırma demək olar ki, yalnız milliyyətçilər arasında məlumdur və adi camaata da onlardan məlum olubdur. Qaldı ki, sadəcə "Körfəz" adlandırılmasına, bu amerikalıların kəşfidir və başqa ölkələrdə istifadə edilmir. Wertuose (talk) 05:52, 26 iyul 2012 (UTC)

Hörmətli idarəçilər! Bildiyiniz kimi bütün sahələrdə olduğu kimi Azərbaycan kinosu sahəsində də qeyri-ensiklopedik məqalələr çoxluq təşkil edir. Bunların da yaradıcısı olaraq, artıq həm də idarəçi kimi məsuliyyəti öz üzərimə götürürəm. Yaxın vaxtlarda həmin məqalələrin təftişinə başlayacam. O məqalələrin ki, inkişaf etdirilmə ehtimalı yoxdur, onlar tərəfimdən silinəcək. Düşünürəm ki, məqalələri quran biri kimi daha səliqəli təftişi də mən edə bilərəm. Ona görə təklif edirəm bu sahəyə aid məqalə, siyahı və fayllar mövzusunda mənə etimad edilsin və tələskənlik edilib silinməsin. Fikirlərinizi bilmək maraqlı olar.--Vüsal Ağayev (talk) 15:55, 25 iyul 2012 (UTC)

  --►CEKLİ^{de gəlsin} 03:45, 26 iyul 2012 (UTC)

Tam dəstəkləyirəm. Amma bəzən elə məqalələrə rast gəlirəm ki, onlar digər vikilərdə var, amma bizdə intervikilər yerləşdirilmədiyi üçün məqalənin əhəmiyyəti bilinmir. Ona görə də silməzdən əvvəl ən azından rus vikisində yoxlamağı təklif edirəm. Çünki bizim və sovet kinosu xadimlərinin bir çoxu haqda rus vikisində məqalələr var. Wertuose (talk) 05:58, 26 iyul 2012 (UTC)

Bu çox yaxşı olar. Ensiklopedik şəxs olmayan çoxlu sayda kino sahəsi adamı haqqında məqalə var. Bunlar 2007-ci ildən bu yana silinməyibsə təbii ki, indi də heç bir idarəçi tərəfindən silinməyəcək. Ancaq özün təftiş edib qeyri-ensiklopedik olanları silərsən. İkinci problem də kino şəkilləri ilə bağlıdır. Ona da vaxtın olanda bir nəzər yetirsən yaxşı olar. --Sortilegus (talk) 13:30, 31 iyul 2012 (UTC)

Salam hörmətli həmkarlar. Əvvəlcə hamınızın Qurbanlıq bayramınızi təbrik edirəm. 2 məsələni sizinlə müzakirə etmək istəyirəm. Bunlardan biri Azərbaycanın rayon və şəhərlərinin, digəri isə "Ölkələrinə görə" yazılışı ilə başlayan kateqoriyaların azvikidə adlandırılmasıdır. Bilirsiniz ki, azvikidə əsas ad bizim rayonlara, 2-ci dərəcəli ad isə (mötərizə işarəsindən istifadə etməklə) şəhərlərə verilmişdir. Məsələn, Masallı rayon, Masallı (şəhər) isə bu rayonun inzibati mərkəzi olan şəhər haqqında məqalənin adıdır. Bir vaxtlar mən də bu cür adlandırmanın tərəfdarlarından və hətta təşəbbüskarlarından biri olmuşam. Amma indi intervikiləri və digər vikilərin təcrübəsini təftiş edəndən sonra görürəm ki, bu yanlış mövqe olub. Əslində, rayon haqqında məqalə "Masallı rayonu", şəhər haqqında məqalə isə "Masallı" olmalıdır. Bu cür adlandırma Azərbaycanın bütün rayon və şəhərlərinin haqqında olan məqalələrə tətbiq olunmalıdır. Nə qədər ki, məqalə sayımız 100 000 keçməyib, bu məsələni həll etsək yaxşı olar (hətta indinin özündə də bunun üçün bot köməyi bizə lazım olacaq). İkinci bir məsələ, "Ölkələrinə görə" yazılışı ilə başlayan kateqoriyaların adlarıdır. Məncə, bu cür kateqoriyalar "Ölkələrə görə" kimi yazılışı ilə başlasa daha düzgün olar. Məsələn, Kateqoriya:Ölkələrinə görə şəhərlər yox, Kateqoriya:Ölkələrə görə şəhərlər və s. Azərbaycan dilinin qaydaları baxımından bu daha düzgün görünür. Xahiş edirəm, bu 2 məsələ ilə bağlı fikirlərinizi bildirəsiniz. Əgər ümumi razılığa gəlsək botlardan da xahiş edərik ki, bu texniki problemlərin həllində bizə yardımçı olsunlar. Hörmətlə:--Sortilegus (talk) 19:53, 25 oktyabr 2012 (UTC)