 |
 |
Ureyim.az |  |
 |
Delicious in Dungeon,[a] Yaponiyada tanınan adı ilə Dungeon Meshi[b] – Ryoko Kui tərəfindən yazılan və illüstrasiya olunan manqa seriyası. 2014-cü ilin fevralından 2023-cü ilin sentyabrına qədər "Enterbrain" nəşriyyatının "Harta" jurnalında nəşr olunmuşdur. Manqa seriyasının 14 tankobon cildi buraxılmışdır. Manqa seriyası Layos Todenin başçılığı altında zindan fəth etməklə məşğul olan bir qrup macəraçı haqqındadır. Onlar uğursuz bir macəradan sonra ölmüş yoldaşlarından birini diriltmək üçün zindanda yeni bir macəraya yollanırlar və sağ qalmaq üçün bədheybətləri bişirib yeməyə başlayırlar.
| Delicious in Dungeon | |
 Birinci tankobon cildinin üzlüyü. Personajlar: Layos Toden (öndə), Senşi, Çilçak Tims və Marsil Donato (arxada). | |
| ダンジョン飯 (Dungeon Meshi) | |
|---|---|
| Janr | macəra, kulinariya, fentezi komediyası |
| Manqa | |
| Manqaka | Ryoko Kui |
| Nəşriyyat | Enterbrain |
| Jurnal | Harta |
| Demoqrafiya | seynen |
| Nəşr tarixi | 15 fevral 2014 – 15 sentyabr 2023 |
| Cildlər | 14 (cild siyahısı) |
| Fəsil sayı | 97 |
| Anime serialı | |
| Rejissor | Yoşihiro Miyacima |
| Ssenarist | Kimiko Ueno |
| Bəstəkar |
|
| Studiya | Trigger |
| Lisenziya | Netflix |
| Kanal | Tokyo MX, SUN, KBS, TVA, AT-X, BS11 |
| Yayım tarixi | 4 yanvar 2024 – hazırda |
| Seriyalar | 24 (seriya siyahısı) |
"Trigger" studiyası tərəfindən çəkilən anime serialı adaptasiyasının birinci mövsümü 2024-cü ildə yayımlanmışdır. Anime serialının ikinci mövsümü anons edilmişdir. Manqa seriyası 2024-cü ildə Seyun mükafatının qalibi olmuşdur.
Zindanların və müxtəlif irqlərin mövcud olduğu fentezi dünyasında macəraçı qruplar ekspedisiyalar təşkil edərək bir adada yerləşən zindanı kəşf etməyə çalışırlar. Onlar zindanın xəzinəsi olduğuna inanılan müəmmalı Qızıl Krallığı tapmaq ümidindədirlər. Hekayə belə macəraçı qruplardan birinin zindan ekspedisiyası zamanı qırmızı əjdahaya məğlub olması ilə başlayır. Qrupun "uzun adam" (insan) sehrbazı Falin Toden son anda teleportasiya sehrindən istifadə edərək qrupun digər üzvlərini xilas edə bilir, lakin özü əjdaha tərəfindən yeyilir. Qrupun üzvləri – Falinin qardaşı və uzun adam Layos Toden, yarımboy tələ ustası Çilçak Tims və elf sehrbaz Marsil Donato zindana yenidən enmək və Falini tapıb diriltmə sehri ilə xilas etmək istəyirlər. Lakin ləvazimatlarının və tədarüklərinin çoxu zindanda qaldığı üçün bu missiya onlar üçün çətin görünür. Bu zaman Layos zindanda yaşayan bədheybətləri ovlamağı və yeməyi təklif edir. Çilçak və Marsil istəmədən də olsa, bu planla razılaşmalı olurlar. Onlar zindanın başlanğıcında bədheybətləri və zindanda yetişən bitkiləri bişirmək üzrə mütəxəssisə çevrilmiş cırtdan Senşi ilə tanış olurlar. Senşi onların komandasına qoşulmağa razı olur. Onlar səyahətləri boyunca müxtəlif bədheybətlər qarşılaşırlar və onlardan yeməklər bişirirlər.
Müəllif Ryoko Kui bir müsahibəsində yeməklərlə arasının yaxşı olmadığını və uşaqlıqdan yemək seçdiyini bildirmişdir.[1] Uşaq olanda bədheybət rəsmləri çəkərkən hansı bədheybətin ən güclü olduğunu fikirləşməkdən zövq aldığını və manqanı hazırlayarkən bu xatirələrindən istifadə etdiyini açıqlamışdır.[2] O, əvvəlcə sadəcə hobbi kimi zindan kəşf etmə manqası yazmağı planlaşdırmış, lakin redaktoru Masaru Hiroinin dəstəyindən sonra uzun manqa seriyası yazmağa qərar vermişdir. Belə ki, Kui əvvəlcə elmi fantastika janrında olan "Nō no naka wo kaku"[c] adlı bir manqa serializasiya etmək istəsə də, onun evinə gələn Hiroi bu ideyanı dəfələrlə rədd etmiş və Kuinin stolunda daha sonra "Delicious in Dungeon" manqasına çevriləcək işi görmüşdür. Manqanın ilkin qaralama versiyasında material həddən çox olduğu üçün redaktorlar bir çox şeyi çıxarmalı olmuşdurlar. Kui personajların müxtəlif dillərdə danışmasını istəsə də, hekayənin oxucular tərəfindən darıxdırıcı hesab olunmasından narahat olmuş və diqqəti yayındacaq bu cür elementləri çıxarmışdır. O, bütün hekayənin sadəcə zindanda baş verməsini istədiyi üçün əvvəlcə personajların soyadlarını və zindanın yerləşdiyi ölkənin adını vermək istəməmişdir. Lakin hekayə irəlilədikcə Hiroi personajları artırmasını və dünyanı genişləndirməsini istəmişdir.[1] Kui manqanın serializasiyasından öncə "Heç vaxt bitməyəcək hekayə" və "Üzüklərin hökmdarı" kimi fentezi əsərlərini oxumuş, ilhamlanmaq üçün "Dungeons & Dragons" qayda kitablarını oxumağa və "Legend of Grimrock" kimi rol oyunlarını oynamağa başlamışdır.[3][4] O, xüsusilə, 1990-cı ildə buraxılmış "Wizardry 6: Bane of the Cosmic Forge" oyununun manqa üçün ən böyük ilham mənbəyi olduğunu açıqlamışdır. Oyunda insanlar, elflər, cırtdanlar, pərilər, köpək-adamlar kimi personajlar bədheybətlərlə dolu qalaya düşürlər və yollarını tapmağa çalışırlar.[5] Manqa üçün "Delicious in Dungeon" adını Hiroi seçmişdir.[3]
Anime adaptasiyası üçün Ryoko Kui bəstəkar kimi Yasunori Mitsudaya üstünlük vermişdir, çünki onun "Chrono Cross" oyunu üçün hazırladığı saundtreki bəyənmişdir.[4] Rejissor Yoşihiro Miyacima müsahibəsində qeyd etmişdir ki, o, 2011-ci ildən etibarən Ryoko Kuinin yaradıcılığı ilə tanışdır və "Delicious in Dungeon" 2014-cü ildə serializasiya olunmağa başlayanda bir gün manqanın animesini çəkməyi arzulamışdı. O, xüsusilə, manqada yeyilə bilən "zirehlər"in olduğu epizoddan təsirlənmişdir. 2019-cu ildə manqa üçün tanıtım animasiyası çəkmək "Trigger" studiyasına həvalə olunanda Miyacima rejissor kimi layihə üçün könüllü olmuşdur. O, anime serialı adaptasiyası üçün tez-tez Kui ilə məsləhələşmiş, personajların düşüncələri ilə bağlı fikirlərini almışdır.[6] Miyacima manqanın dünyası haqqında ətraflı məlumatlar verən "Delicious in Dungeon World Guide: The Adventurer's Bible" kitabının ona çox kömək etdiyini bildirmişdir.[7] Personaj dizayneri Naoki Takeda da manqa seriyasının fanatı kimi layihəyə qoşulmuşdur. Onlar animedəki yeməklərin həm ləzzətli görünməsi, həm də "bədheybət hissi"ni saxlaması üçün peşəkar yemək dizayneri Mao Momiciyə müraciət etmişdirlər. Layos, Marsil, Çilçak və Senşi personajlarının hər biri üçün 100-ə yaxın səs aktyoru sınaqlara dəvət olunmuşdur. Miyacimanın sözlərinə görə Layosu səsləndirəcək aktyoru tapmaq çətin idi, çünki Layosun "qəribəliyini təbii şəkildə səsləndirəcək" şəxs axtarırdılar. O, personajların düşdüyü vəziyyəti kifayət qədər gülməli hesab etdiyi üçün aktyorlardan personajları sadəcə təbii səsləndirməyi istəmişdir.[6] Zindan yeməklərini yeməyin necə bir hiss olduğunu başa düşmələri üçün studiyada onlara böcəklər yedizdirilmişdir.[8]
Manqa seriyası Ryoko Kui tərəfindən yazılmış və çəkilmişdir. Bu, müəllifin ilk uzun işidir.[9] 15 fevral 2014-cü ildən 15 sentyabr 2023-cü ilə qədər "Enterbrain" nəşriyyatının "Hart" jurnalında serializasiya olunmuşdur.[10][11] Manqa seriyasının 14 tankobon cildi buraxılmışdır. Birinci cild 15 yanvar 2015-ci ildə,[9] sonuncu – 14-cü cild 15 dekabr 2023-cü ildə buraxılmışdır.
10 avqust 2022-ci ildə manqa seriyasının anime serialı adaptasiyası anons edilmişdir.[12] "Trigger" studiyası tərəfindən çəkilən anime serialının rejissoru Yoşihiro Miyacima, ssenaristi Kimiko Ueno, personaj dizayneri Naoki Takeda və bəstəkarları Yasunori Mitsuda ilə Şunsuke Tsuçiyadır.[11] Animenin ilk seriyası 2023-cü ilin iyulunda baş tutmuş Anime Expo tədbirində nümayiş etdirilmişdir.[13] İlk üç seriyası 8 dekabr 2023-cü ildən başlayaraq üç həftə boyunca Yaponiya kinoteatrlarında ekranlaşdırılmışdır. Birinci mövsüm 4 yanvardan 13 iyun 2024-cü ilə qədər Tokyo MX və digər telekanallar vasitəsilə yayımlanmış və 24 seriya davam etmişdir.[11][14] Birinci açılış mahnısı "Bump of Chicken" qrupu tərəfindən ifa olunan "Sleep Walking Orchestra"[d] mahnısı, birinci bağlanış mahnısı "Ryokuoushoku Shakai" qrupu tərəfindən ifa olunan "Party!!"[e] mahnısıdır.[13] İkinci açılış mahnısı "Sumika" qrupu tərəfindən ifa olunan "Unmei"[f] mahnısı, ikinci bağlanış mahnısı "Regal Lily" qrupu tərəfindən ifa olunan "Kirakira no Hai"[g] mahnısıdır.[15] Anime "Netflix" tərəfindən lisenziyalaşdırılmışdır.[11]
Birinci mövsümün sonuncu seriyası yayımlandıqdan sonra ikinci mövsüm anons edilmişdir.[11]
2017-ci ildə manqanın beşinci cildi münasibətilə "Senshi's Easy Cooking!"[h] adlı 80 saniyəlik stop-motion animasiya buraxılmışdır. "YouTube" vasitəsilə buraxılan animasiyada Senşinin yemək bişirmək üçün ayaqlı göbələklərdən necə istifadə etdiyi göstərilir.[16] 2019-cu ildə manqanın səkkizinci cildi münasibətilə "Trigger" studiyası tərəfindən istehsal olunmuş 30 saniyəlik tanıtım animasiyası buraxılmışdır.[17]
13 fevral 2021-ci ildə "Delicious in Dungeon World Guide: The Adventurer's Bible"[i] kitabı buraxılmışdır. "Delicious in Dungeon" dünyası haqqında məlumatlardan ibarət olan 176 səhifəlik kitaba bütün personajlar haqqında məlumatlar, bədheybət ensiklopediyası, dünya xəritəsi və terminlər lüğəti daxildir.[18] 15 fevral 2024-cü ildə kitabın "Delicious in Dungeon World Guide: The Adventurer's Bible, Complete Edition"[j] adlı daha geniş və yenilənmiş versiyası buraxılmışdır.[19]
15 sentyabr 2022-ci ildə "Arclight Games" tərəfindən hazırlanmış "Monster Eater"[k] adlı stolüstü oyun buraxılmışdır. "Monster Maker" stolüstü oyununa əsaslanan bu oyunda oyunçular bir macəraçı qrupu idarə edirlər və məğlub etdikləri bədheybətləri bişirirlər.[20]
Manqa 2015-ci ildə "Comic Natalie" redaktorlarının səsverməsi ilə təqdim olunan Comic Natalie Mükafatının qalibi olmuşdur.[21] 2015-ci ildə Yaponiyada kitab satıcıları tərəfindən tərtib olunmuş tövsiyə olunan manqalar siyahısında "Delicious in Dungeon" ilk yerdə göstərilmişdir.[22] "Kono Manga ga Sugoi!" təlimat kitabçasının 2016-cı il buraxılışının kişi oxucular siyahısında birinci yerdə göstərilmişdir.[23] Manqa 2024-cü ildə "ən yaxşı komiks" kateqoriyası üzrə Seyun mükafatının qalibi olmuşdur.[24] 2024-cü ildə "Ən yaxşı davam edən manqa" kateqoriyası üzrə Amerikan Manqa Mükafatının qalibi seçilmişdir.[25]
 |
 |
UREYIM.AZ |  |
 |
|
