Manuel Sarausa Klavyer - Wikipedia - Ureyim.az

Manuel Sarausa Klavyer 19 may 1917-ci ildə Santonyada anadan olmuşdur. O, 1934-cü ildə könüllü olaraq hərbi aviasiyaya getmişdir. Burada iki il təlim keçdikdən sonra İspaniya vətəndaş müharibəsi başlamışdır.^[3]

Santyaqo-de-la-Ribera Pilot Məktəbində (Mursiya) kursu bitirdikdən sonra çavuş rütbəsi almış və Polikarpov İ-15 "Çato" təyyarəsinin pilotluğuna başlamışdır. 1937-ci ilin sonunda 3-cü eskadrilyaya təyin edilmişdir. Qısa müddət sonra Bilbao və Santander döyüşlərində iştirak etmişdir.^[4] Həmin ilin dekabrında 4-cü eskadrilyanın komandiri olmuşdur və Teruel döyüşündə iştirak etmişdir. 1938-ci ilin iyununda İ-16 təyyarələrindən təşkil olunmuş 21-ci qırıcı eskadriliyanın komandiri təyin olundu,^[5][6] bununla da o, qırıcı eskadriliyalara rəhbərlik edən üç ispan pilotdan biri oldu. Sarausa bu eskadriliya ilə Ebro döyüşündə və Kataloniya əməliyyatında fəal iştirak etmişdir.^[3] Franko tərəfdarı qüvvələrə əsir düşməmək üçün öz təyyarəsi ilə Fransaya sığınmışdır.^[5]

Respublikanın süqutundan sonra Sovet İttifaqına köçmüşdür. O, burada Sovet Hərbi Hava Qüvvələrində polkovnik rütbəsində, digər ispan pilotları ilə birlikdə Xarkovda (Ukrayna) yerləşdirilmişdir.^[5] Sovet aviasiyasının bir hissəsi kimi İkinci Dünya müharibəsinin başlaması ilə arxa cəbhəyə təxliyə edilmiş və daha sonra hərbi əməliyyatlarda iştirak etmişdir. 12 oktyabr 1942-ci ildə Bakıda, Keşlə aeroportunda təlim uçuşu zamanı digər təyyarə ilə toqquşma nəticəsində həlak olmuşdur.^[3][5][7] O, İspaniya vətəndaş müharibəsi illərində ən azı 23 düşmən təyyarəsini vurmuşdu (ispan mənbələrinə görə – 10) və respublika aviasiyasının ən görkəmli pilotlarından biri idi.^[3]

2019-cu ildə doğulduğu Santonyada Manuel Sarausa Klavyerin xatirə lövhəsi açılmışdır. Açılış mərasimində yerli sakinlər, yerli administrasiyanın nümayəndələri, o cümlədən şəhər meri, hərbi tarixçilər, aviatorun törəmələri və rusiyalı diplomatlar iştirak ediblər.^[8]